புதிய தமிழகம் கட்சி வேட்பாளா்கள் பட்டியல் நாளை வெளியீடு: க. கிருஷ்ணசாமி

புதிய தமிழகம் கட்சியின் வேட்பாளா் பட்டியல் ஞாயிற்றுக்கிழமை (மாா்ச் 29) வெளியிடப்படவுள்ளதாக அக்கட்சியின் தலைவா் க.கிருஷ்ணசாமி தெரிவித்துள்ளாா்.

கோவையில் இருந்து விமான மூலம் சென்னை வந்த புதிய தமிழகம் கட்சித் தலைவா் கிருஷ்ணசாமி சென்னை விமான நிலையத்தில் செய்தியாளா்களிடம் கூறியதாவது:

புதிய தமிழகம் கட்சியின் வேட்பாளா் பட்டியலை ஞாயிற்றுக்கிழமை வெளியிட உள்ளோம். 60 முதல் 70 தொகுதிகளில் வேட்பாளா்களை நிறுத்துவதற்கான பணிகள் நடைபெற்று வருகின்றன. தமிழகத்தில் ஆட்சி மாற்றத்தை உருவாக்க 2024-இல் அதிமுக கூட்டணியுடன் தோ்தலில் போட்டியிட்டோம். தொடா்ந்து, 2026 சட்டப்பேரவைத் தோ்தலிலும் கூட்டணிக்கான பேச்சு நடைபெற்றது. ஆனால், உரிய கெளரவத்தை அதிமுக கொடுக்காமல் உதாசீனப்படுத்தினா்.

அதற்கான விலையைக் கொடுக்க வேண்டி இருக்கும். அமித் ஷா எப்படியாவது தன்னை முதல்வராக்கிவிடுவாா் என்ற நம்பிக்கையில் எடப்பாடி பழனிசாமி உள்ளாா். வெற்றி பெற முடியாத 27 இடங்களை பாஜகவுக்கு கொடுத்துள்ளாா்.

தோ்தலில் வெற்றி பெற வேண்டும் என்ற நோக்கத்தில் கூட்டணி வைக்காமல், தன்னைச் சுற்றி இருக்கும் சிலா் வெற்றி பெற்றால் போதும் என்கிற மனநிலையில் எடப்பாடி உள்ளாா்.

இதனால், அதிமுக கூட்டணியிலிருந்து புதிய தமிழகம் கட்சி விலகியது. கூட்டணிக்கான பேச்சை, தவெக முன்னெடுத்தால், அதுகுறித்து பரிசீலிப்போம் என்றாா்.