பந்தன் வங்கி நிகர லாபம் சரிவு

மாா்ச் மாதத்துடன் நிறைவடைந்த காலாண்டில் பந்தன் வங்கியின் நிகர லாபம் ரூ.55 கோடியாகச் சரிந்துள்ளது.

இது குறித்து வங்கி வெளியிட்டுள்ள அறிக்கையில் தெரிவிக்கப்பட்டுள்ளதாவது:

கடந்த ஜனவரி முதல் மாா்ச் வரையிலான 2023-24-ஆம் நிதியாண்டின் 4-ஆவது காலாண்டில் வங்கியின் நிகர லாபம் ரூ.55 கோடியாகக் குறைந்துள்ளது.

முந்தைய 2022-23-ஆம் நிதியாண்டின் இதே காலாண்டில் வங்கி ரூ.808 கோடி நிகர லாபம் ஈட்டிருந்தது.

முந்தைய 2023-ஆம் ஆண்டின் ஜனவரி-மாா்ச் காலாண்டில் வாராக் கடன்களை ஈடு செய்வதற்காக ரூ.735 கோடி ஒதுக்கீடு செய்யப்பட்டிருந்தது. ஆனால், இந்த ஆண்டின் அதே காலாண்டில் ரூ.1,774 கோடி ஒதுக்கீடு செய்யப்பட்டதால் நிகர லாபம் சரிவைக் கண்டுள்ளது.

மதிப்பீட்டுக் காலாண்டில் வங்கி ரூ.3,852 கோடி வாராக் கடனை தள்ளுபடி செய்துள்ளது.

முந்தைய 2022-23-ஆம் நிதியாண்டின் 4-ஆவது காலாண்டில் ரூ.1,796 கோடியாக இருந்த வங்கியின் செயல்பாட்டு லாபம் மதிப்பீட்டுக் காலாண்டில் ரூ.1,838 கோடியாக உயா்ந்துள்ளது என்று அந்த அறிக்கையில் குறிப்பிடப்பட்டுள்ளது.