பொதுத் துறையைச் சோ்ந்த யூகோ வங்கியின் நிகர லாபம் கடந்த ஜனவரி-மாா்ச் காலாண்டில் ரூ.652.43 கோடியாக அதிகரித்துள்ளது.

இது குறித்து வங்கி செவ்வாய்க்கிழமை வெளியிட்டுள்ள அறிக்கையில் தெரிவிக்கப்பட்டுள்ளதாவது:

ஜனவரி முதல் மாா்ச் வரையிலான கடந்த நிதியாண்டின் நான்காவது காலாண்டில் வங்கியின் நிகர லாபம் ரூ.652.43 கோடியாக உள்ளது. முந்தைய 2023-24-ஆம் நிதியாண்டின் இதே காலாண்டோடு ஒப்பிடுகையில் இது 24.1 சதவீதம் அதிகம்.

மதிப்பீட்டுக் காலாண்டில் வங்கியின் மொத்த வருவாய் 16.5 சதவீதம் அதிகரித்து ரூ.8,136.79 கோடியாக உள்ளது. வங்கியின் வட்டி வருவாய் 23.35 சதவீதம் உயா்ந்து ரூ.2,698 கோடியாக உள்ளது.

ஓராண்டுக்கு முன்பிருந்ததைவிட கடந்த மாா்ச் 31-ஆம் தேதி வங்கியின் மொத்த வாராக் கடன் 77 அடிப்படை புள்ளிகள் குறைக்கப்பட்டு 2.69 சதவீதமாகவும் நிகர வாராக் கடன் 39 அடிப்படை புள்ளிகள் குறைக்கப்பட்டு 0.50 சதவீதமாகவும் இருந்தது என்று அந்த அறிக்கையில் தெரிவிக்கப்பட்டுள்ளது.