நடிகை லட்சுமி ‘ஊர்வசிப்’ பரிசு பெற்ற போது நான் பாராட்டிப் பேசினேன். மீண்டும் அவரை வாழ்த்த அவர் டைரக்ட் செய்த முதல் படம், ‘மழலைப் பட்டாளம்’ பார்த்தபோது தோன்றியது.

‘புலிக்குப் பிறந்தது பூனை ஆகாது’ என்பதைத் தனது டைரக்‌ஷன் துறையிலும் நிரூபித்துக் காட்டிவிட்டார் அவர். தந்தை டைரக்டர் ஒய்.வி.ராவ் இன்று உயிருடன் இருந்தால் பெரிதும் பூரித்துப் போய் விடுவார்.

‘மழலைப்பட்டாளம்’ பார்த்தேன். பெயருக்கேற்ப ஒரு மழலைப்பட்டாளத்தை வைத்துக் கொண்டு குழந்தைகளுடன் குடும்பத்தினர் அனைவரும் தன்னை மறந்து விலா குலுங்க சிரித்து மகிழும்படியான ஒரு நல்ல பொழுதுபோக்குப் படம் வெகு நாட்களுக்குப் பிறகு வருகிறது. (மூலக்கதையில் உள்ள விரசத்திற்கு இடம் தரவில்லை).

லட்சுமி டைரக்‌ஷன் பயிலச் சென்ற இடம் பாலச்சந்தரின் குருகுலம்.

ஒரு தரமான மாணவியை உருவாக்கி வெளியே அனுப்பியிருக்கும் பணியில் இன்று அவர்து குரு பாலசந்திரும் பெருமைப்படலாம்.