பகுதி - 605

பொன் கோவைக்கே பல் கோவைக்கே பொய்ப் போகத்தைப் பகர்வார் தம்... பொன்னின் வரிசைக்காகவும்; (மற்ற) பலவிதமான வரிசைகளுக்காகவும் பொய்யான சிற்றின்பத்தை விலைகூறி விற்பவர்களுடைய,

பொய்க்கே மெய்க்கே பித்தாகி போகித்து ஏகைக்கு பொருள் தேடி...  பொய் மொழிகளாலும் உடலாலும் பித்தேறிப்போய்; (அந்த இன்பத்தை) அனுபவித்துச் செல்வதற்கான பொருளைத் தேடிக்கொண்டு,

தெற்கு ஓடி காசிக்கு ஓடி கீழ் திக்கு ஓடி பச்சிமமான திக்கு ஓடி...  தெற்கேயும்; வடக்கே காசி வரையிலும்; கிழக்கிலும்; மேற்கிலும் ஓடி (பல ஊர்களுக்கு) ஓடித் திரிந்து;

பாணிக்கு ஓடி தீவுக்கு ஓடிக் கெட்டிடலாமோ... பல நாடுகளுக்கும்; பல தீவுகளுக்கும் (கப்பலேறிச்) சென்று வீணாக அழிந்து போகலாமோ? (அப்படிப் போகாமல்),

தற்கோலி பாவிப்பார் நல் சீரைச் சார தற்பரம் ஆனாய்... தன்னுள் தான் ஆழ்ந்து தியானித்து உன்னையே சிந்தையில் வைப்பவர்கள் நல்ல கதியை அடைவதற்கான பரம்பொருளாக ஆனவனே!

தப்பா முப்பாலைத் தேடி தேசத்தார் நிற்கத் தகையோடே... தவறாத அறம், பொருள், இன்பம் என்னும் மூன்று நெறிகளைத் தேடிவருகின்ற மக்கள் ஒருபுறமாக நிற்க; அருளோடு,

முன் கானப் பேதைக்காகப் போய் முன் பால் வெற்பில் கணி ஆனாய்...  முன்னர் காட்டிலிருந்த வள்ளியைத் தேடிச்சென்று* அவள் முன்னாலே வேங்கை மரமாக நின்றவனே!

(அறம் பொருள் இன்பத்தைத் தேடிவருபவர் ஒருபக்கமாக நிற்கவும்; நான்காவதான வீட்டுப் பேற்றை நாடிய வள்ளியைத் தானே வலியச் சென்று மணந்துகொண்டவனே என்பது உட்பொருள்)

முத்தா முத்தீ அத்தா சுத்தா  முத்தா முத்திப் பெருமாளே.. முத்தைப் போன்றவனே!  (ஆகவனீயம், காருகபத்தியம், தட்சிணாக்கினி எனப்படும்) மூன்று தீயால் வளர்க்கப்படும் வேள்விகளின் தலைவனே!  சுத்தனே!  முக்தி நிலையில் (பற்றற்று) நிற்பவனே!  முக்தியைத் தருகின்ற பெருமாளே!

சுருக்க உரை

தன்னுள் தான் ஆழ்ந்து (நான் யார் என்னும் விசாரணையை மேற்கொண்டு) தியானித்து உள்ளே உன்னையே நிறுத்துபவர்கள் மேலான கதியை அடையும்படியாகப் பரம்பொருளாக நிற்பவனே!  எப்போதும் மாறாதவையான அறம், பொருள், இன்பங்களைத் தேடிவரும் மக்கள் ஒருபுறத்தே இருக்க; காட்டிலிருந்த வள்ளியை அருளோடு தேடிச் சென்று அவள் முன்னால் வேங்கை மரமாக நின்றவனே!  முத்தைப் போன்றவனே!  மூன்று தீக்களால் வளக்கப்படும் வேள்விகளின் தலைவனே!  சுத்தனே!  பற்றற்ற நிலையில் நிற்பவனே!  முக்தியைத் தருகின்ற பெருமாளே!

பொன்னுக்காகவும் பலவிதமான வரிசைகளுக்காகவும் பொய்யான சிற்றின்பத்தை விலைபேசுபவர்களுக்குக் கொடுப்பதற்காகப் பொருள்வேண்டி, நான் நான்கு திசைகளிலும் ஓடி; பல தேசங்களுக்கும் தீவுகளுக்கும் ஓடி வீணே அழியலாமோ?  (அவ்வாறு அழியாமல் தன்னை உணர்ந்து, உன்னை தியானித்து மேம்பட அருள வேண்டும்.)