மழலையின் சிரிப்புக்கு ஏது வேலி!
பொங்கிய அலைகடலுக்கு ஏது வேலி!
பூக்கின்ற மரங்களுக்கு ஏது வேலி!
இயற்கை காற்றிற்கு ஏது வேலி!
தாயன்பிற்கு ஏது வேலி!
வேலி தாண்டிய காற்று
வரப்போகும் இயற்கை அழிவின்
முன்னோடி!

நல்முத்து நிறைந்த மக்கள் பரவையிலே
சாயங்கள் கலந்த பாசிஇலஞ்சங்களை
வேலி தாண்டிய சட்டக் காற்று
அழிக்கும் காலம் எப்போது?
சாதி மதமின்றி வாழும்
சமுதாயம் உருவாக
வேலி தாண்டிச் சென்ற காற்று
உதவாதோ!

ஏழை பணக்காரன் பேதமின்றி
சரிநிகர் சட்டங்கள் படைக்க
வேலி தாண்டிய காற்று
உதவாதோ!
சுதந்திரப்போராட்டச் செந்நீர்
பட்ட இன்பத்தில்
மகிழ்ந்திருந்த மண்மாதா
அரசியல்வாதிகள் நடத்திய
போர்க்கள யுத்தத்தினைப்
பார்க்க மனமின்றி வாயு புதல்வனை
அனுப்பினாளோ!

படித்தவர் விலகியிருக்க
பாமரர் வயிற்றிற்காக
விலை போக
பதவி காக்க
சட்டத்தை வளைத்த
ஈனர்களை அழிக்க வேலி தாண்டிய காற்று!

மார்கழி மாதத்து மழைத்தண்ணீர்
மாசற்ற மக்கள் வித்தை விதைக்க
வேலி தாண்டிய காற்றுடன்
ஒய்யார பாலே நடனம்!

இனி ஒரு சுயநலமில்லா உலகம் படைக்க
யார் வருவார் என்ற ஆவலில்
வேலி தாண்டிய காற்று!