80. ஒன்று கொலாம் - பாடல் 5

பாடல் 5:

    அஞ்சு கொலாம் அவர் ஆடரவின் படம்
    அஞ்சு கொலாம் அவர் வெல் புலன் ஆவன
    அஞ்சு கொலாம் அவர் காயப்பட்டான் கணை
    அஞ்சு கொலாம் அவர் ஆடினதாமே

பொழிப்புரை:

சிவபிரான் தன் திருமேனியில் ஆபரணமாக அணிந்திருக்கும் நாகத்தின் படங்கள் ஐந்து. சிவபிரான் வென்ற புலன்கள், மெய், வாய், கண் மூக்கு செவி என்று ஐந்தாவன. சிவபிரானால் காயப்பட்ட மன்மதன் பயன்படுத்தும் பூங்கணைகள், தாமரை, அசோகு, மா, முல்லை மற்றும் கருங்குவளை ஆகிய ஐந்து பூக்கள். சிவபிரான் விரும்பி நீராடுவது, பசுக்களிலிருந்து பெறப்படும் பால், தயிர், நெய், கோசலம் மற்றும் கோமியம் ஆகியவற்றால் செய்யப்படும் பஞ்சகவியம் ஆகும்.  .