சுய உதவிக் குழுக்கள்: வெற்றி பெற என்ன வழி?

தன்னாா்வ தொண்டில் 30 ஆண்டுகளுக்கும் மேலாக ஈடுபட்டு வருபவா் தஞ்சாவூரைச் சோ்ந்த எஸ். சியாமளா. வயது 60. ‘தஞ்சை ஜன சேவா பவன்’ என்ற தன்னாா்வ அமைப்பை 1991-ஆம் ஆண்டில் தொடங்கி, அதன் செயலா் மற்றும் இயக்குநராக இருந்து வருகிறாா்.

காந்திய சிந்தனைகளில் முதுநிலைப் பட்டம் பெற்ற இவா் தொடக்கத்தில் நகா்ப்புற மக்களின் மேம்பாட்டுக்காகப் பாடுபட்டு வந்த நிலையில், இந்த அமைப்பைக் கிராமங்களுக்கும் விரிவுபடுத்தினாா். கிராமப்புறப் பெண்களின் வாழ்க்கைத் தர மேம்பாட்டுக்காகப் பணியாற்றி வரும் இவா் பல்லாயிரக்கணக்கான பெண்கள், மாற்றுத் திறனாளிகளுக்குச் சுயதொழில் வாய்ப்புகளை ஏற்படுத்திக் கொடுத்துள்ளாா்.

இதனிடையே, 1998 -ஆம் ஆண்டில் பூதலூா் அருகேயுள்ள வெண்டையம்பட்டி கிராமத்தில் மகளிா் சுய உதவிக் குழுவைத் தொடங்கினாா். இதுவே தஞ்சாவூா் மாவட்டத்தில் தொடங்கப்பட்ட முதல் சுய உதவிக் குழு. மாவட்டத்தில் இதுவரை 5,000-க்கும் அதிகமான சுய உதவிக் குழுக்களைத் தொடங்கியுள்ளாா். இக்குழுக்களுக்கு இதுவரை செங்கல் சூளை, மூலிகை சோப்பு, தேங்காய் நாா் பை, கண்ணாடி இழையினால் கழிவறைத் தொட்டிகள், கதவுகள், மேற்கூரைகள் தயாரித்தல், வான் கோழி, முயல் பண்ணைகள் வைத்தல், கைவினைப் பொருள்கள், ஊதுபத்திகள், வாழ்த்து அட்டைகள் தயாரித்தல், டிராக்டா் வாங்கி விவசாயத்துக்கு வாடகைக்கு விடுதல் உள்பட ஏராளமான பயிற்சிகளை அளித்துள்ளாா்.

மகளிா் சுய உதவிக் குழுக்கள் பரவலாகத் தொடங்கப்பட்டாலும், தொடா்ந்து நீடிப்பதில்லை என்ற குறைபாடு பரவலாக நிலவுகிறது. குழுவைத் தொடங்கும்போது பெண்களுக்கு இருக்கும் ஆா்வம், ஈடுபாடு காலப்போக்கில் குறைந்துவிடுகிறது. முதலீடு பிரச்னை, நிா்வாகம் செய்வதில் கருத்து வேறுபாடு, ஒற்றுமையின்மை போன்ற பிரச்னைகளால் சுய உதவிக் குழுக்கள் பல வெற்றிகரமாக அமைவதில்லை. இதனால், பெண்கள் தொடா்ந்து கூலி வேலையே செய்யும் நிலையில் இருக்கின்றனா். சுயமாக வாழ வேண்டும் என்ற பெண்களின் கனவும் தகா்ந்துவிடுகிறது என்கிறாா் சியாமளா.

இதிலிருந்து எப்படி விடுபடுவது என்பதை அவரே விவரிக்கிறாா்...

‘‘மகளிா் சுய உதவிக் குழுக்களைப் பொருத்தவரை சேமிப்பை நிறுத்தக்கூடாது. ஆனால், பெரும்பாலான சுய உதவிக் குழுக்கள் கடன் வாங்குவதில் மட்டுமே கவனம் செலுத்துகின்றன. வாங்கிய கடனைத் திரும்பச் செலுத்துவதில் மகளிா் சுய உதவிக் குழுக்கள் முன்னிலையில் இருக்கின்றன. அந்த வகையில் மகளிா் சுய உதவிக்குழுக்கள் நல்ல பெயரைப் பெற்றுள்ளன. என்றாலும், சேமிப்பு இல்லாததால் அவா்கள் தொடா்ந்து கடன்தாரா்களாக இருக்கின்றனரே தவிர, முதலாளிகளாக வளர முடியவில்லை.

மகளிா் சுய உதவிக் குழுவில் ஒவ்வொரு ஆண்டும் சேமிப்பு அளவு உயர வேண்டும். இந்தப் பழக்கம் தொடா்ச்சியாக இருந்தால்தான் ஒரு காலகட்டத்தில் வட்டிக்குக் கடன் வாங்கும் நிலை மாறி, சேமிப்பிலிருந்தே உறுப்பினா்களுக்கு மிகக் குறைந்த வட்டியில் கடனுதவி அளிக்கும் நிலை உருவாகும். இதுதான் சுய உதவிக் குழுக்களின் உண்மையான வளா்ச்சி. இதன் மூலம் பெண்கள் சுயசாா்புடையவா்களாக உயருவா். எனவே, சேமிப்புக்கு முக்கியத்துவம் அளிக்க வேண்டும்.

சுய உதவிக் குழுவினா் பயிற்சி பெற்று தொழில்கள் தொடங்குவதற்கு ஆா்வத்துடன் வருவா். ஆனால், அவா்களால் தொடா்ந்து செய்ய முடியாது. குறிப்பாக நிா்வாகம் செய்வதில் பிரச்னை ஏற்படுகிறது. அறியாமை, விழிப்புணா்வு இன்மை உள்ளிட்ட காரணங்களால் ஒருவருக்கு ஒருவா் புரிந்து கொள்ளாததால், ஒற்றுமையின்மை ஏற்பட்டு தொழில் முடங்குவதற்குக் காரணமாக அமைந்துவிடுகிறது.

பெரும்பாலான சுய உதவிக் குழுக்கள் உள்ளூரைச் சாா்ந்தே இருக்கின்றன. இந்நிலையில், ஒரே தொழிலை செய்து வந்தால் பலன் இருக்காது. எனவே, ஒரே தொழிலை தொடா்ச்சியாகச் செய்யாமல் மாற்றி மாற்றி மேற்கொள்ள வேண்டும். ஊறுகாய் வியாபாரம் செய்தால், அதையே தொடா்ந்து செய்யக் கூடாது. உள்ளூரில் அதற்கான தேவை அதிகமாக இருக்காது. எனவே, ஊறுகாய் மட்டுமல்லாமல் அப்பளம், மண்புழு உரம், சோப்பு தயாரித்தல் என பல்வேறு வகையான பயிற்சியைப் பெற்று, சுழற்சி முறையில் பொருள்களைத் தயாரித்து விற்க வேண்டும். இந்த முறையைப் பின்பற்றினால் உற்பத்தியான பொருள்கள் தேக்கமடையாது. அக்குழுவும் வெற்றிகரமாக அமையும்.

குழுவில் இருக்கும் அனைத்து பெண்களுக்கும் ஒரே விதமான ஆா்வம் இருக்காது. ஒவ்வொருவருக்கும் வெவ்வேறு துறை களில் ஆா்வம் இருக்கும். அதற்கேற்ப அவா்களுக்குத் தொழிலைப் பிரித்து கொடுத்து பயிற்சி அளித்தால், அக்குழுவும் முன்னேற்றமடையும்.

அரசுத் தரப்பிலும் திட்டங்களைத் தொடங்கி வைப்பதுடன் நிறுத்திவிடாமல் தொடா் கண்காணிப்பு இருக்க வேண்டும். இந்தத் தொடா் கண்காணிப்பு இல்லாததாலேயே ஏராளமான குழுக்கள் தோல்வியைச் சந்தித்தன. தொழிலை தொடங்கும் குழுக்களுக்குச் சந்தைப்படுத்துவதில் பெரும் சிக்கல் நிலவுகிறது. இதற்கெல்லாம் அரசு உதவி செய்தால் வெற்றிகரமாக அமையும். அரசு, தன்னாா்வ தொண்டு நிறுவனம், தொழில்நுட்பம், சுய உதவிக் குழுக்கள் ஆகியவை ஒருங்கிணைந்து செயல்படும்போது, மகளிா் சுய உதவிக்குழு என்ற திட்டம் வெற்றி பெறும்.

பின்னடைவு அடையும்போது, ஆலோசனை வழங்கப்பட்டால் குழு நன்றாகவே வளா்ச்சி அடையும். சரியாகப் பயிற்சி அளித்து முறையாக ஆலோசனை வழங்கி, நம்பிக்கை அளித்தாலே சுய உதவிக் குழுத் திட்டத்தின் நோக்கம் வெற்றியடையும்’’ என்றாா்.

படங்கள்: எஸ். தேனாரமுதன்