டூத் பிரஷை பயன்படுத்திவிட்டு தூக்கி வீசாமல், அதை வீடுகளில் அன்றாடம் உபயோகிக்கும் பொருள்களைப் பாதுகாக்கப் பயன்படுத்தலாம். 

இரண்டு டைல்ஸ்கள் ஒன்று சேரும் இடத்தில் அழுக்குகள் கோடு போன்று தங்கிவிடும்.  மாப் போட்டுத் துடைத்தாலும் அழுக்குகள் போகாது. அதனால் டைல்ஸ் சுத்தம் செய்யும்போது டூத் பிரஷால் இடுக்குகளில் தேய்த்துத் துடைத்தால் அழுக்கு நீங்கி தரை முழுவதும் சுத்தமாகும்.

சீப்பை சுத்தம் செய்வதற்கு சூடான நீரில் சோப்புத் தூளை கலந்து அதில் சீப்பை ஊற வைக்கவும். பின்பு சிறிது நேரம் கழித்து பிரஷால் சீப்புகளின் இடுக்கில் உள்ள அழுக்குகளை தேய்த்து எடுத்தால் சீப்பில் உள்ள அழுக்குகள் எளிதாக நீங்கிவிடும்.

எண்ணெய் பசை படிந்த கேஸ் ஸ்டவ் பர்னர்கள், சிம்னி ஆகியவற்றை சுத்தம் செய்வதற்கு பிரஷை பயன்படுத்தலாம். சமையல் சோடா, சோப்புத் தூள் இரண்டையும் வெந்நீரில் கலந்து பிரஷால் தேய்த்து துடைத்தால் எண்ணெய் பசைகள் நீங்கிவிடும்.

ஷூ, செருப்பு முதலான காலணிகளை சோப்பு நீரால் பிரஷை வைத்து தேய்த்து துடைத்தால் அழுக்குகள் நீங்கி பளிச்சென்று இருக்கும். நன்கு சுத்தம் செய்த பிறகு ஷூக்கு பாலிஷ் போட்டால் ஷூக்கள் புதிது போல் இருக்கும்.

புருவம், மீசைகளை தவறாமல் சுத்தமான பிரஷால் சரி செய்யும்போது புருவம், மீசை அழகாகவும் அடர்த்தியாகவும் இருக்கும்.   வெதுவெதுப்பான நீரில் நகங்களை சிறிது நேரம் வைத்து கழுவி விட்டு பின்பு பிரஷால் மெதுவாக நக இடுக்குகளில் சுத்தம் செய்தால் நகங்கள் சுத்தமாகும்.

 கதவு, ஜன்னல் இடுக்குகளில் ஒட்டடை மற்றும் அழுக்கு சேர்ந்திருக்கும். பூ வேலைப்பாடுகள் உள்ள கதவுகள் மற்றும் ஜன்னல் கதவுகளின் ஓரங்களில் இருக்கும் அழுக்கை சாதாரணமாக துடைக்க முடியாது. அதற்கு பிரஷ் மூலம் இடுக்குகளில் உள்ள அழுக்கை தேய்த்தால் அழுக்கு நீங்கிவிடும்.