மழை பொழியுதடா!

காற்ற டிக்குது! காற்ற டிக்குது!

கதவை மூடுங்கடா - நாம்

நேற்று நட்ட செடிகள் எல்லாம்

தலையை ஆட்டுதடா!

மரத்தில் உள்ள காக்கைக் கூடும்

மெல்ல ஆடுதடா - அது

தரமாய் கட்டி இருப்ப தாலே

தங்கி இருக்குதடா!

காற்று வீச முகிலின் கூட்டம்

கலைந்து போகுதடா - இதை

மாற்றும் படி சின்னச் சின்ன

மழை விழுகுதடா!

மரத்தின் அடியில் ஆடு மாடு

ஒதுங்கி நிற்குதடா - அந்த

மரத்தைக் காற்று அசைக்க அசைக்க

மழை பொழியுதடா!