பல்லாங்குழி ஆடலாமா தங்கச்சி
 பாண்டி விளையாட்டுன்னு பேராச்சி
 பக்கத்துக்கு ஏழுவட்டக் குழிகுடைஞ்சி
 பலகையில செதுக்கியது தங்கச்சி!
 
 புளியம்பழக் கொட்டைகளைச் சேமிச்சி
 குழிக்கைந்து நிரப்பிடணும் தங்கச்சி
 ஒத்தக்குழி காயையள்ளி யோசிச்சி
 ஒன்னொன்னா குழியிடணும் தங்கச்சி!
 
 பொக்கைக்குழி ஆவதைநீ குறிவச்சி
 பக்கக்குழி காயையள்ளு தங்கச்சி
 நான்குகாய் சேர்வதனைக் கண்வச்சி
 நல்லமுத்து அள்ளிடணும் தங்கச்சி!
 
 ஒருகுழிக்குக் காய்குறைந்து பற்றாம
 ஒருவர்தோற்று ஆட்டமேதும் நிற்காம
 உதவிக்காய் கொடுத்திடணும் பூரிச்சி
 ஒற்றுமையா ஆடிடுவோம் தங்கச்சி!