புத்தாண்டை வரவேற்போம்!

புன்னகை பூக்கும் முகங்கள் கொண்டு 
புதிய ஆண்டை வரவேற்போம்!
நன்மை செய்யும் நல்லவராவோம்
நாட்டில் அன்பின் மணம் வீசும்!

உதவும் உள்ளம் ஊரை உயர்த்தும்
உண்மையின் வழியில் நடந்திடுவோம்!
புதுமை காணும் வேட்கை கொள்வோம்
பூமியில் மேன்மையின் ஒளி வீசும்!

மரம் செடி கொடிகள் பறவை விலங்கு
மனிதர்க் குதவும் நற்தோழர்!
மலைகள் ஆறு அலைகடல் எல்லாம்
மக்கள் வாழ்வின் ஆதாரம்!

கல்வி என்பது வெறும் படிப்பல்ல - ஏழையின் 
கண்ணீர் துடைத்தல் அதன் பயனாம்!
செல்வம் என்பதைத் தேவைக்குப் போக 
சேவைக்கு அளித்தால் மனம் மகிழும்!

வெற்றுப் பேச்சில் காலம் கழித்தால் - வாழ்வு 
விழலுக்கு இறைத்த நீராகும்!
கற்போம் பண்புகள்! நிற்போம் நல்வழி!
ஒவ்வொரு நாளும் பொன்னாகும்!