வருடப் பிறப்பு வருகிறது
வாழ்த்திப் பாட வாருங்கள்
அறுபது ஆண்டுகள் கொண்டது நம்
அன்னைத் தமிழின் ஆண்டுளாம்!

சித்திரை பிறக்கும் நன்னாளில்
சிறந்த கனிகள் பலவைத்து
நித்திரை நீங்கி கண்ணாடி
நின்று பார்ப்போம் முன்னாடி!

வேப்பம் பூவில் பச்சடியும்
வெல்லம் போட்டுப் பாயசமும்
வைப்போம் சுவாமி முன்பாக
வாழ்த்தித் துதிப்போம் ஒன்றாக!

வருடப் பிறப்பு என்பதனால் 
வாங்கிய புதிய பஞ்சாங்கம் 
கருத்தாய்ப் படித்துப் பலன்சொல்ல
கைகள் கட்டிக் கேட்டிடுவோம்!

மாடு கன்றுகள் பெருகிடவும்
மண்வளம் செழித்து சிறந்திடவும் 
நாடி இறைவன் தாள்பணிந்து
நல்ல நாளில் வேண்டிடுவோம்!

சித்திரை மாதப் பெளர்ணமியாய் 
சிறந்து வாழ்க்கை ஒளிபெறட்டும்
அத்தகு மகிழ்ச்சி அனைவர்க்கும்
ஆண்டு முழுதும் கிடைக்கட்டும்!