மலையைப் போல ஆல மரமும்
    அழகாய்த்  தோன்றுதே - அது
தலைக்கு மேலே கிளைகளை விரித்தே
    குடைபோல் நிற்குதே!

தன்னை நாடி பறந்தே வந்திடும் 
    பறவைகள் அனைத்துமே - மேலே
தங்கிக் கொள்ள தனது கிளையில்
    இடத்தைச் கொடுக்குதே! 

குட்டிக் குட்டியாய் ஆல மரத்தின்
    பழங்கள் இருக்குதே!-அவற்றை
கொத்திக் கொத்தி பறவைகள் தின்றே
    பசியைப்போக்குதே!

ஆல இலையும் ஆடு தின்ன
    உணவாய் ஆகுதே! - பல்லும்
ஆலம் விழுதால் துலக்கி வந்தால்
     உறுதி யாகுதே!

சிறுவர் கட்டி ஊஞ்ச லாட
    சிறிய  விழுதுமே! - தரையில் 
பெரிய விழுதும் ஊன்றி நின்றே
     மரத்தைத் தாங்குமே!

வாழ்ந்தால் ஆல மரத்தைப் போல
    வாழ வேண்டுமே!- நாம்
வாழ்ந்ததைப் பற்றி ஊரார்  புகழ்ந்தே
    பேச வேண்டுமே!