'ஆல்ஃபபெட்' நிறுவனத்தின் இயக்குநர்களில் ஒருவராக கூகுள் நிறுவனத்தின் தலைமைச் செயல் அதிகாரி (சிஇஓ) சுந்தர் பிச்சை (45) நியமிக்கப்பட்டுள்ளார். ஆல்ஃபபெட் நிறுவனம் கூகுளின் தாய் நிறுவனமாகும்.
இதுகுறித்து ஆல்ஃபபெட் நிறுவனத்தின் சிஇஓ லாரி பேஜ் வெளியிட்ட அறிவிக்கையில் கூறப்பட்டுள்ளதாவது:
கூகுள் சிஇஓவாக மிகச் சிறப்பான பணியாற்றி வருபவர் சுந்தர் பிச்சை. அவரது முயற்சியால் சிறந்த வளர்ச்சி, கூட்டமைப்புகள், வழங்கும் சேவைகளில் புத்தாக்கம் ஆகியவற்றை கூகுள் கண்டது. ஆல்ஃபபெட் நிறுவனத்தில் அவருடன் இணைந்து பணியாற்றுவதை ஆர்வத்துடன் எதிர்பார்த்துக் காத்திருக்கிறேன் என்று அந்த அறிவிக்கையில் லாரி பேஜ் தெரிவித்துள்ளார்.
கூகுள் நிறுவனத்தில் நீண்ட காலமாகப் பணிபுரிந்துவரும் சுந்தர் பிச்சை, சென்னையில் பிறந்தவர் ஆவார்.