காஸா பகுதியில் 3 பாலஸ்தீனர்களை இஸ்ரேல் படையினர் சுட்டுக் கொன்றனர்.
இதுகுறித்து பாலஸ்தீன சுகாதாரத் துறை அமைச்சகம் ஞாயிற்றுக்கிழமை வெளியிட்டுள்ள அறிக்கையில் தெரிவிக்கப்பட்டுள்ளதாவது: 
இஸ்ரேல் வீரர்கள் துப்பாக்கியால் சுட்டதில் 3 பாலஸ்தீனர்கள் உயிரிழந்தனர்; மேலும் ஒருவர் காயமடைந்தார்.
காயமடைந்த நபர் மருத்துவமனையில் அனுமதிக்கப்பட்டுள்ளார் என்று அந்த அறிக்கையில் தெரிவிக்கப்பட்டுள்ளது.
காஸா எல்லைக்கு அப்பாலிருந்து இஸ்ரேல் ராணுவ ஹெலிகாப்டர் மற்றும் பீரங்கியை நோக்கி சிலர் துப்பாக்கியால் சுட்டதாகவும், அதற்குப் பதிலடியாகவே தங்களது வீரர்கள் திருப்பிச் சுட்டதாகவும் இஸ்ரேல் ராணுவம் தெரிவித்துள்ளது.
ஹமாஸ் கட்டுப்பாட்டிலுள்ள காஸா பகுதியிலிருந்து இஸ்ரேல் மீது 3 ஏவுகணைகள் வீசப்பட்டதைத் தொடர்ந்து, இந்தச் சம்பவம் நடைபெற்றதாக ராணுவம் வெளியிட்டுள்ள அறிக்கையில் தெரிவிக்கப்பட்டுள்ளது. எனினும், இந்த ஏவுகணைத் தாக்குதலால் உயிர்ச் சேதம் ஏற்பட்டதாக உடனடி தகவல் இல்லை.