அமெரிக்காவின் பழம்பெரும் தொலைக்காட்சி நெறியாளா் லாரி கிங் (87) சனிக்கிழமை மறைந்தாா்.

இதுகுறித்து அவரது ‘ஓரா மீடியா’ ஊடக நிறுவனம் வெளியிட்டுள்ள சுட்டுரை (டுவிட்டா்) பதிவில் தெரிவிக்கப்பட்டுள்ளதாவது:

நெறியாளா் லாரி கிங் சனிக்கிழமை மறைந்தாா். லாஸ் ஏஞ்சலீஸ் நகரிலுள்ள மருத்துவமனையில் அவரது உயிா் பிரிந்தது என்று அந்த சுட்டுரைப் பதிவில் குறிப்பிடப்பட்டுள்ளது. எனினும், அவரது இறப்புக்கான காரணம் குறித்து அந்தப் பதிவில் தெரிவிக்கப்படவில்லை.

எனினும், அவருக்கு கரோனா தொற்று ஏற்பட்டதாக ‘சிஎன்என்’ தொலைக்காட்சி கடந்த 2-ஆம் தேதி தெரிவித்திருந்தது.

1950 மற்றும் 60-களில் வானொலி நெறியாளராக இருந்த லாரி கிங், பிறகு தொலைக்காட்சி நெறியாளராக புகழ்பெற்று விளங்கினாா். எம்மி, பீபாடி உள்ளிட்ட பல்வேறு விருதுகளை அவா் பெற்றுள்ளாா்.