லாலு கட்சியுடன் நிதீஷ் கட்சி விரைவில் இணையும்: மத்திய அமைச்சா் கிரிராஜ் சிங்

லாலு பிரசாத் யாதவின் ராஷ்ட்ரீய ஜனதா தளம் (ஆா்ஜேடி) கட்சியுடன் பிகாா் முதல்வா் நிதீஷ் குமாா் தலைமையிலான ஐக்கிய ஜனதா தளம் (ஜேடியு) கட்சி விரைவில் இணைந்துவிடும் என்று மத்திய ஊரக வளா்ச்சித் துறை அமைச்சா் கிரிராஜ் சிங் தெரிவித்தாா்.

பிகாரில் ஆா்ஜேடி-ஜேடியு-காங்கிரஸ்-இடதுசாரிகள் அடங்கிய கூட்டணி ஆட்சியில் உள்ளது. பிகாா் பேரவையில் நிதீஷ் கட்சியைவிட அதிக எம்எல்ஏக்கள் ஆா்ஜேடியில் இருந்தாலும் அந்த மாநிலத்தில் லாலுவின் மகன் தேஜஸ்வி யாதவ் துணை முதல்வராக உள்ளாா் என்பது குறிப்பிடத்தக்கது.

இரு கட்சிகளும் பாஜகவுக்கு எதிராக தீவிரமாக அரசியல் நடத்தி வருகின்றன. வரும் 2024 மக்களவைத் தோ்தலில் பிகாரில் பாஜகவுக்கு ஆளும் கூட்டணி கடும் சவாலாக இருக்கும் என்று கருதப்படுகிறது.

இந்நிலையில், பிகாரைச் சோ்ந்த மத்திய அமைச்சா் கிரிராஜ் சிங் அந்த மாநில அரசியல் குறித்துக் கூறியதாவது:

லாலு பிரசாதின் தனிப்பட்ட அரசியல் கணக்குகளை நான் இங்கு பகிா்ந்து கொள்கிறேன். அவா் என்னிடம் தனிப்பட்ட முறையில் சில விஷயங்களைக் கூறியுள்ளாா். அவை அனைத்தையும் வெளியே கூற முடியாது. ஆனால், லாலுவின் ஆா்ஜேடி கட்சியுடன் நிதீஷ் குமாரின் ஜேடியு விரைவில் இணைந்துவிடும் என்பதை மட்டும் கூற முடியும். எனவேதான் மக்களவைத் தோ்தல் தொகுதிப் பங்கீடு குறித்து இரு கட்சிகளும் இதுவரை பேச்சு நடத்தவில்லை.

பிகாா் துணை முதல்வராக இருக்கும் தனது மகன் தேஜஸ்வி யாதவை முதல்வராக்க வேண்டும் என்றும் லாலு விரும்புகிறாா் என்றாா்.

அண்மையில் இந்தியா கூட்டணி கூட்டத்தில் பங்கேற்க தில்லி சென்ற லாலு பிரசாதும் மத்திய அமைச்சா் கிரிராஜ் சிங்கும் ஒரே விமானத்தில் பாட்னாவுக்குத் திரும்பினா். அப்போது, லாலு தன்னிடம் அரசியல் விவகாரங்களை விவாதித்ததாக கிரிராஜ் சிங் கூறியுள்ளாா்.

ஆா்ஜேடி, ஜேடியு மறுப்பு:

இது தொடா்பாக ஆா்ஜேடி தலைவா் தேஜஸ்வி யாதவ் செய்தியாளா்களிடம் கூறுகையில், ‘மத்திய அமைச்சா் கிரிராஜ் சிங் தனக்கு ஏதாவது முக்கியத்துவம் கிடைத்துவிடாதா என்ற ஆசையில் இதுபோன்று பேசி வருகிறாா். அவரது பேச்சை யாரும் பெரிதாக எடுத்துக் கொள்ளப் போவதில்லை’ என்றாா்.

ஜேடியு தலைவா் ராஜீவ் ரஞ்சன் சிங் லாலன் இது தொடா்பாக கூறுகையில், ‘பரபரப்புக்காக எதை வேண்டுமானாலும் கிரிராஜ் சிங் பேசுவாா். அவரை கண்டுகொள்ளத் தேவையில்லை’ என்றாா்.