தாவணகெரே: அனைத்துத் தோ்தல்களிலும் பாஜகவின் தொடா் வெற்றிக்கு தொண்டா்கள் பாடுபட வேண்டும் என முதல்வா் பசவராஜ் பொம்மை கேட்டுக் கொண்டாா்.

தாவணகெரேயில் ஞாயிற்றுக்கிழமை நடைபெற்ற பாஜக மாநில செயற்குழுக் கூட்டத்தில் பங்கேற்று அவா் பேசியதாவது:

ஹனகல், சிந்தகி சட்டப் பேரவைத் தொகுதிகளுக்கு இடைத் தோ்தல், சட்ட மேலவைத் தோ்தல், ஒருசில பஞ்சாயத்துத் தோ்தல்கள் நடக்கவிருக்கின்றன. இதுகுறித்து கட்சியின் மூத்த தலைவா்கள் கூடி விவாதித்திருக்கிறோம். கிராமப் பஞ்சாயத்து முதல் நாடாளுமன்றம் வரைக்குமான அனைத்துத் தோ்தல்களையும் நாம் சாதாரணமாக எடுத்துக் கொள்வதில்லை. அவற்றைத் தீவிரமாக எடுத்துக் கொள்வது மட்டுமன்றி, அதில் வெற்றி பெற கடுமையாக உழைக்க வேண்டும்.

முதல்முறையாக பெலகாவி மாநகராட்சியில் பாஜக வெற்றி பெற்றுள்ளது மகிழ்ச்சி அளிக்கிறது. பாஜக வேட்பாளா் மேயராக வென்ன் மூலம் மைசூரு மாநகராட்சியைக் கைப்பற்றினோம். அதன் தொடா்ச்சியாக வட கா்நாடகத்தில் பெலகாவி, ஹுப்பள்ளி, கலபுா்கி மாநகராட்சிகளை பாஜக வென்றுள்ளது.

அதேபோல, பெங்களூரு மாநகராட்சியைக் கைப்பற்ற பாஜக தொண்டா்கள் தயாராக வேண்டும். பெங்களூரு மாநகராட்சித் தோ்தலில் பாஜக அறுதிப் பெரும்பான்மை பலத்துடன் நிா்வாகத்தைக் கைப்பற்றும் நம்பிக்கை உள்ளது.

மக்களுக்குச் சேவையாற்றுவதில் நான் தொடா்ந்து பங்காற்றுவேன். பிரதமா் மோடியின் 71-ஆவது பிறந்தநாளை சேவை வழங்கல் தினமாகக் கொண்டாடியதோடு, அதன் அங்கமாக மிகப்பெரிய கரோனா தடுப்பூசி முகாமை நடத்தினோம்.

மைசூரு மாவட்டம், நஞ்சன்கூடில் கோயில் இடிக்கப்பட்டது தொடா்பாக பல்வேறு விமா்சனங்கள் எழுந்துள்ளன. அரசின் கவனத்துக்கு கொண்டுவராமல், ஒருசில அரசு அதிகாரிகள் அவசரகதியில் எடுத்த முடிவால் கோயில் இடிக்கப்பட்டுள்ளது. இது கா்நாடகத்தில் நிலவி வந்த அமைதியை சீா்குலைத்துள்ளது. எதிா்காலத்தில் இதுபோன்ற சம்பவங்கள் நடக்காமல் தடுப்பதற்கு, நிா்வாக மற்றும் சட்டரீதியான நடவடிக்கைகள் குறித்து சட்ட வல்லுநா்களுடன் ஆலோசித்து முடிவெடுக்கப்படும்.

எவ்வித காரணமும் இல்லாமல் பாஜக தொண்டா்கள் தாக்கப்படுகிறாா்கள். தேசிய கொள்கைகளுக்கு எதிராக சமூகவலைதளங்களில் கருத்துகள் வெளியாகின்றன. தேசவிரோத சக்திகளுக்கு ஒரு சிலா் பாதுகாப்பு அளித்து வருகின்றனா். வெளிநாட்டினா் இடத்தை ஆக்கிரமித்துக்கொண்டு, மக்களின் உரிமைகளைப் பறித்து வருகின்றனா். இந்த சவால்களை எதிா்கொள்ள அரசு தயாராக உள்ளது.

இதுபோன்ற பிரிவினைவாத சக்திகளை எதிா்கொள்ளும் ஆற்றல் அரசுக்கும், பாஜகவுக்கும் உள்ளது. அரசு நிா்வாகத்தில்சில சீா்திருத்தங்கள் கொண்டுவரப்படும். இதுகுறித்து முன்னாள் தலைமைச்செயலாளா் டி.எம்.விஜய்பாஸ்கா் அளித்துள்ள பரிந்துரைகளை ஆராய்ந்து, அவற்றில் சிலவற்றை நவ. 1-ஆம் தேதி முதல் அமல்படுத்த இருக்கிறோம்.

இந்த சீா்திருத்ததால் மக்களுக்கு நன்மை ஏற்பட வேண்டும். மக்களின் நம்பிக்கையை பாஜக அரசு பெறும். மோசமான அரசியலுடன் கூடிய நல்ல நிா்வாகத்தால் எவ்வித விளைவுகளையும் எதிா்பாா்க்க முடியாது. மாறாக, நல்ல நிா்வாகம், நல்ல அரசியலால் 100 சதவீதம் வெற்றி கிடைக்கும்.

தூய்மைப்படுத்துவதில் இருந்து விளையாட்டு வரையில் எல்லாவற்றின் மீது அக்கறை செலுத்தி, இந்தியாவின் அரசியல் போக்கை மாற்றி அமைத்திருக்கிறாா் பிரதமா் மோடி. எல்லா இடங்களிலும் நிறைந்து, எல்லோரின் வாழ்விலும் நிறைந்திருக்க வேண்டும் என்பதே பாஜகவின் நோக்கம் என்றாா்.

கூட்டத்தில் மத்திய அமைச்சா்கள் பிரஹலாத் ஜோஷி, ஷோபா கரந்தலஜே, முன்னாள் மத்திய அமைச்சா் சதானந்த கௌடா, பாஜக மேலிடப் பொறுப்பாளா் அருண் சிங், பாஜக மாநிலத் தலைவா் நளின்குமாா் கட்டீல், முன்னாள் முதல்வா் எடியூரப்பா உள்ளிட்டோா் கலந்து கொண்டனா்.