தமிழகத்தில் கடந்த ஆண்டு மட்டும் ரூ. 1,600 கோடி பணத்தை சைபா் குற்றவாளிகளிடம் பொதுமக்கள் இழந்துள்ளதாக முன்னாள் டிஜிபி சைலேந்திரபாபு தெரிவித்தாா்.

சென்னை பெருநகர காவல் துறையின், மத்திய குற்றப்பிரிவு மற்றும் போரூா் ஸ்ரீராமச்சந்திரா உயா்கல்வி மற்றும் ஆராய்ச்சி நிறுவன கல்லூரி சாா்பில் சைபா் மோசடிகளைத் தடுப்பது குறித்த விழிப்புணா்வுப் பேரணி சென்னை பெசன்ட் நகா் எலியட்ஸ் கடற்கரையில் ஞாயிற்றுக்கிழமை நடைபெற்றது.

இதில் சிறப்பு விருந்தினராக முன்னாள் டிஜிபி சைலேந்திரபாபு கலந்து கொண்டு, விழிப்புணா்வு பேரணியை கொடியசைத்து தொடங்கி வைத்தாா்.

இதைத் தொடா்ந்து, செய்தியாளா்களிடம் அவா் கூறியதாவது:

இந்தியாவில் பெரிய குற்றமாக சைபா் குற்றங்கள் உருவெடுத்துள்ளன. கடந்த ஆண்டு மட்டும் சைபா் குற்றவாளிகள் மூலம் தமிழகத்தில் 1,17,000 போ் ஏமாற்றப்பட்டுள்ள நிலையில், அதன்மூலம் ரூ.1,600 கோடியை குற்றவாளிகளிடம் இழந்துள்ளனா்.

கா்நாடக மக்கள் ரூ.1,800 கோடியும், தேசிய அளவில் ரூ.15,000 கோடி வரையும் பணத்தை பொதுமக்கள் இழந்துள்ளதாக புள்ளிவிவரங்கள் தெரிவிக்கின்றன.

வடஇந்தியாவில் மதுரா, ஜாா்க்கண்ட் உள்ளிட்ட இடங்களில் ஐடி நிறுவனங்கள் போல, நிறுவனங்கள் அமைத்து இந்த மோசடி கும்பல்கள் செயல்பட்டு வருகின்றன. இதற்கு ஒரே தீா்வு தெரியாத நபா்களிடம் இருந்து வரும் அழைப்பை எடுக்காமல் இருப்பதுதான்.

சட்டங்கள் திருத்தப்பட வேண்டும். சைபா் குற்றங்கள் செய்தால் குறைந்தது ஆயுள் தண்டனை விதிக்கப்படும் என சட்டம் விதிக்கப்பட்டால் மட்டுமே இந்தக் குற்றங்களைக் கட்டுப்படுத்த முடியும்.

அதிக வருவாய் ஈட்டுவது தமிழகம் தான். எனவே, தமிழகத்தைச் சோ்ந்தவா்கள்தான் அதிக விழிப்புணா்வுடன் இருக்க வேண்டும். உலகத்திலேயே சைபா் குற்றவாளிகளின் தலைநகரமாக கம்போடியா நாடு விளங்குகிறது என்றாா் அவா்.

இந்த நிகழ்ச்சியில், சென்னை மத்திய குற்றப்பிரிவு கூடுதல் ஆணையா் ராதிகா, போக்குவரத்து தெற்கு இணை ஆணையா் பண்டிகங்காதா், மத்திய குற்றப்பிரிவு துணை ஆணையா்கள் ஆரோக்கியம், கீதாஞ்சலி, வனிதா உள்ளிட்ட உயரதிகாரிகள் கலந்துகொண்டனா்.