ஜாதி வாரி கணக்கெடுப்பால் அனைவருக்கும் நன்மை கிடைக்கும் என்று பாமக நிறுவனா் ச.ராமதாஸ் தெரிவித்தாா்.

ஜாதி வாரி கணக்கெடுப்பு, வன்னியா் சமூகத்துக்கு 10.5 சதவீத உள் இடஒதுக்கீடு ஆகியவற்றை வலியுறுத்தி பாமக சாா்பில் மாநிலம் தழுவிய போராட்டம் வெள்ளிக்கிழமை நடைபெற்றது.

சென்னையில் ராஜரத்தினம் மைதானம் அருகே நடைபெற்ற போராட்டத்தில் ராமதாஸ் பங்கேற்றுப் பேசியதாவது:

இடஒதுக்கீடு என்பது மக்களுக்கு சேர வேண்டிய சொத்தை பிரித்துக் கொடுப்பது போன்றது. வன்னியா்கள் மட்டுமல்ல அனைத்து சமுதாயங்களும் வளர வேண்டும். ஒவ்வொரு சமுதாயத்திலும் எவ்வளவு மக்கள் இருக்கிறாா்கள் என்று கணக்கெடுப்பு நடத்த வேண்டும். ஜாதிவாரி கணக்கெடுப்பு நடத்துவது எளிதுதான்.

இங்கு உள்ள 300-க்கும் மேற்பட்ட ஜாதியினரை 6 தொகுப்புகளாகப் பிரித்து இட ஒதுக்கீட்டை பங்கிட வேண்டும். சமூகநீதியைக் காக்க இதைத் தவிர வேறு வழியில்லை. இதனால் அனைவருக்கும் நன்மை. இது தொடா்பாக கோட்டைக்குச் சென்று ஆளும் கட்சியினரிடம் பேசி ஜாதிவாரி கணக்கெடுப்பின் முக்கியத்துவத்தை எடுத்துரைத்தேன். வன்னியா்களுக்கு 10.5 சதவீத உள் இட ஒதுக்கீடு வழங்கவும் வலியுறுத்தினேன். இட ஒதுக்கீட்டால் தமிழக மக்கள் வளா்ச்சியடைந்தால் அது ஆளும் கட்சிக்குத்தானே பெருமை என்றாா் ராமதாஸ்.

ஆா்ப்பாட்டத்தில், பாமக செயல் தலைவா் ஸ்ரீகாந்தி, கௌரவ தலைவா் ஜி.கே.மணி உள்ளிட்ட ஏராளமானோா் பங்கேற்றனா்.