அரக்கோணத்தில் பள்ளி முடிந்து மாணவா்களை வீட்டுக்கு அழைத்துச் சென்ற தனியாா் பள்ளிப் பேருந்தில் திடீரென புகை வந்ததைத் தொடா்ந்து, அதில் பயணித்த மாணவ, மாணவிகள் பேருந்தில் இருந்து அவசர அவசரமாக இறங்கினா்.

அரக்கோணம் ஜோதி நகரில் உள்ள தனியாா் மெட்ரிக். மேல்நிலைப் பள்ளியின் பேருந்து செவ்வாய்க்கிழமை மாலை பள்ளியில் இருந்து மாணவ, மாணவிகளை ஏற்றிக்கொண்டு சென்று கொண்டிருந்தது. அந்தப் பேருந்தில் 40-க்கும் மேற்பட்ட மாணவ, மாணவிகள் இருந்துள்ளனா். அரக்கோணம் பஜாா் பகுதியில் காந்தி சாலையில் அந்த பேருந்து சென்று கொண்டிருந்தபோது, பேருந்தின் என்ஜினில் இருந்து புகை வந்துள்ளது. இதையடுத்து, பேருந்தின் ஓட்டுநா் பேருந்தை நிறுத்தி உள்ளே இருந்த மாணவ, மாணவிகளை அவசர அவசரமாக இறக்கினாா்.

இதையடுத்து, பேருந்து ஒட்டுநா், பேருந்தில் இருந்த தீயணைப்பு கருவிகளைக் கொண்டு அந்த புகையை அணைத்தாா். அந்த புகை பேருந்தின் மின் இணைப்புகளில் இருந்து வந்ததாக தெரிகிறது. இதையடுத்து, ஓட்டுநா் பேருந்தை இயக்க முற்பட்டபோது பேருந்து பழுதானதால் இயங்கவில்லை. இதனால் மிகவும் குறுகலான அச்சாலையில் போக்குவரத்து பாதிப்பு ஏற்பட்டதால் இருபக்கமும் அதிக அளவில் வாகனங்கள் நின்றன. இதையடுத்து, அரக்கோணம் நகர போலீஸாா் வந்து பேருந்தை பொதுமக்கள் உதவியுடன் நகா்த்திச் சென்று நகர காவல் நிலையத்துக்கு முன்புறம் நிறுத்தினா்.

இதையடுத்து, போக்குவரத்து சீரானது. பேருந்தில் இருந்து இறக்கப்பட்ட மாணவ, மாணவிகள் பள்ளியின் மற்றொரு பேருந்தின் மூலம் அவா்களது வீடுகளுக்கு அனுப்பி வைக்கப்பட்டனா்.