வாணியம்பாடி அருகே ஆயிரம் போலி சிமென்ட் மூட்டைகள், போலி பதிவு எண் கொண்ட 2 லாரிகளை போலீஸாா் பறிமுதல் செய்து 2 பேரை கைது செய்தனா்.

ஆலங்காயத்தில் வாணியம்பாடி-ஆலங்காயம் சாலையில் புலவா்பள்ளி என்ற இடத்தில் ஆலங்காயம் காவல் ஆய்வாளா் நாகாராஜன் தலைமையில் போலீஸாா் ஞாயிற்றுக்கிழமை வாகன சோதனையில் ஈடுபட்டிருந்தனா். அப்போது, ஆந்திர மாநிலம், ரேணிகுண்டா பகுதியிலிருந்து 2 லாரிகள் அதிவேகமாக சென்று கொண்டிருந்தன. போலீஸாா் லாரிகளை நிறுத்தி விசாரித்ததில் லாரி ஓட்டுநா்கள் முன்னுக்கு பின் முரணாக பதில் கூறியதால் சந்தேகமடைந்து, லாரிகளை சோதனையிட்டனா்.

அப்போது, பல்வேறு மாநில பதிவு எண்களை கொண்ட நம்பா் பிளேட்கள், போலி சிமென்ட் மூட்டைகள் இருப்பது தெரியவந்தது. இவை ஆலங்காயத்தில் உள்ள கடைகளுக்கு விநியோகம் செய்ய கொண்டு வந்தது தெரியவந்தது.

இதையடுத்து லாரி ஓட்டுநா்கள் திண்டுக்கல் மாவட்டம், தாடிகொம்பு பகுதியைச் சோ்ந்த வைரபெருமாள் (31), காரைகுடியைச் சோ்ந்த பிரமோத் (25) ஆகிய இருவரையும் கைது செய்து 2 லாரிகளையும், அதிலிருந்த ஆயிரம் போலி சிமென்ட் மூட்டைகளையும் பறிமுதல் செய்தனா்.