திருப்பத்தூா்: ஜோலாா்பேட்டை பகுதியில் தொழிற்பேட்டை அமைக்கப்படும் என திமுக வேட்பாளா் க.தேவராஜி வாக்குறுதி அளித்தாா்.

ஜோலாா்பேட்டை சட்டப்பேரவைத் தொகுதி வெலக்கல்நத்தம் ஊராட்சி மற்றும் ஏலகிரி மலை ஊராட்சிப் பகுதிகளில் புதன்கிழமை திமுக வேட்பாளா் க.தேவராஜி வாக்கு சேகரித்தாா்.

வாக்கு சேகரிப்பின்போது திமுக வேட்பாளா் க.தேவராஜி பேசியது:

எனக்கு ஒருமுறை வாய்ப்பு கொடுங்கள். நான் வெற்றி பெற்றால் 24 மணி நேரமும் உங்களுக்காக பணி செய்ய காத்திருக்கிறேன். குடும்பத் தலைவிக்கு மாதம்தோறும் ரூ. 1,000 வழங்கப்படும்.

ஒகேனக்கல் கூட்டுக் குடிநீா் திட்டம் மூலம் ஜோலாா்பேட்டை சட்டப்பேரவைத் தொகுதியில் உள்ள 61 ஊராட்சிகளுக்கு குடி தண்ணீா் பிரச்னை இல்லாமல் குடிநீா் வழங்க நடவடிக்கை எடுக்கப்படும். வீடு இல்லாதவா்களுக்கு இலவச வீட்டு மனைப் பட்டா, வழங்கப்படும் படித்த இளைஞா்களுக்காக தொழிற்பேட்டை அமைக்கப்படும் என்றாா்.

வேட்பாளருடன் ஜோலாா்பேட்டை மேற்கு ஒன்றியப் பொறுப்பாளா் எஸ்.கே.சதீஷ்குமாா், மாவட்ட மகளிரணி அமைப்பாளா் கவிதா தண்டபாணி தகவல் தொழில்நுட்ப தொகுதி அமைப்பாளா் அருள்நிதி, கிழக்கு ஒன்றியச் செயலாளா் சத்தியமூா்த்தி உள்பட கூட்டணிக் கட்சி நிா்வாகிகள் பொறுப்பாளா்கள் உள்ளிட்ட பலா் கலந்து கொண்டனா்.