பொன்னேரி அருகே சின்னகாவனம் கிராமத்தில் வசிக்கும் வறுமைக்கோட்டுக்குக் கீழ் உள்ளவர்கள் அனைவரையும் முழுமையாக கணக்கெடுத்து, அரசின்  உதவித் தொகையை வழங்கக் கோரி அப்பகுதி மக்கள் வியாழக்கிழமை சாலை மறியலில் ஈடுபட்டனர். 
சின்னக்காவனம் கிராமத்தில் 500-க்கும் மேற்பட்ட குடும்பத்தினர் வசித்து வருகின்றனர். 
இந்நிலையில், குறைவான குடும்பத்தினர் மட்டுமே வறுமைக் கோட்டுக்குக் கீழ் உள்ளவர்கள் என கணக்கெடுக்கப்பட்டுள்ளதாகக் கூறப்படுகிறது. 
இதையடுத்து, அப்பகுதியில் வசிக்கும் வறுமைக்கோட்டுக்கு கீழ் உள்ள அனைவரையும் முறையாக கணக்கெடுத்து, அவர்களுக்கு அரசு அறிவித்த ரூ. 2 ஆயிரம் உதவித் தொகை வழங்கவும், அங்குள்ள கழிவு நீர் கால்வாயை சீரமைக்கவும், அப்பகுதியில் வசிப்பவர்களுக்கு வீட்டுமனைப் பட்டா வழங்கவும் கோரி, பொன்னேரி-பழவேற்காடு சாலையில் பொதுமக்கள் வியாழக்கிழமை சாலை மறியல் போராட்டம் நடத்தினர்.
தகவல் அறிந்து அங்கு சென்ற பொன்னேரி வருவாய்த் துறையினர் மற்றும் பேரூராட்சி அதிகாரிகள் போராட்டத்தில் ஈடுபட்டவர்களிடம் பேச்சுவார்த்தை நடத்தினர். இதையடுத்து, அனைவரும் கலைந்து சென்றனர்.