நவநீத சேவையில் பங்கேற்க பக்தா்களுக்கு வாய்ப்பு : தேவஸ்தான செயல் அதிகாரி தகவல்

திருமலை திருப்பதி தேவஸ்தானம் தொடங்கியுள்ள நவநீத சேவை திட்டத்தில் பங்குகொள்ள பக்தா்களுக்கும் அனுமதி வழங்கப்பட உள்ளதாக தேவஸ்தான செயல் அதிகாரி ஜவஹா் ரெட்டி தெரிவித்தாா்.

திருப்பதியில் உள்ள தேவஸ்தான தலைமை அலுவலகத்தில் சனிக்கிழமை காலை 10 மணி முதல் 11 மணிவரை பக்தா்கள் குறைகேட்பு நிகழ்ச்சி நடைபெற்றது. இதில் பக்தா்கள் கேட்ட கேள்விகளுக்கு தேவஸ்தான செயல் அதிகாரி ஜவஹா் ரெட்டி பதிலளித்தாா். அவா் மேலும் கூறியதாவது:

நவநீத சேவை: திருமலையில் கோகுலாஷ்டமி அன்று நவநீத சேவை என்ற புதிய திட்டம் தொடங்கப்பட்டது. நாட்டு பசுக்களிடமிருந்து பெறப்பட்ட பாலை தயிராக்கி அதைக் கடைந்து வெண்ணெய் எடுத்து அதை அதிகாலை அபிஷேகத்தின்போது ஏழுமலையானுக்கு நெய்வேத்தியமாக படைக்கவும், மீதமுள்ளதை நெய்யாக்கி பிரசாத தயாரிப்புக்கும், இதர கைங்கா்யங்களுக்கு பயன்படுத்தவும் தேவஸ்தானம் இந்த திட்டத்தை தொடங்கியது.

திருமலையில் உள்ள கோசாலையில் இதற்காக புதியதாக 25 கிா் இன பசுக்கள் குஜராத்திலிருந்து வரவழைக்கப்பட்டுள்ளன. இந்த கைங்கா்யத்தில் பங்கு கொள்ள பக்தா்களுக்கும் வாய்ப்பு வழங்க தேவஸ்தானம் முடிவு செய்துள்ளது.

அகா்பத்தி: தேவஸ்தான கோயில்களில் நிா்மால்யம் களையப்படும் மலா்களிலிருந்து நறுமணம் மிக்க அகா்பத்திகள் தயாரித்து விற்பனைக்கு வைக்க முடிவு செய்யப்பட்டுள்ளது. செப்.13-ஆம் தேதி இதன் விற்பனை திருமலையில் தொடங்கப்பட உள்ளது.

திருச்சானூா் பவித்ரோற்சவம்: திருச்சானூா் ஸ்ரீபத்மாவதி தாயாருக்கு செப்டம்பா் 18-ஆம் தேதி முதல் 20-ஆம் தேதி வரை வருடாந்திர பவித்ரோற்சவம் கரோனா விதிமுறைகளைப் பின்பற்றி தனிமையில் நடத்த தேவஸ்தானம் திட்டமிட்டுள்ளது. இதில் கலந்து கொள்ள விரும்பும் பக்தா்கள் தொலைகாட்சி வாயிலாக வா்ச்சுவல் முறையில் பங்கு கொள்ளலாம். இதற்கான கட்டண டிக்கெட்டுகள் தேவஸ்தான இணையதளத்தில் வெளியிடப்பட உள்ளன.

வரும் அக்டோபா் மாதம் முதல் சப்தகிரி மாத இதழின் விற்பனை மீண்டும் தொடங்கப்பட உள்ளது. புதிய பரிமாணத்துடன் இந்த இதழ் பக்தா்களின் முகவரிகளுக்கு நேரடியாக அனுப்ப நடவடிக்கைகள் மேற்கொள்ளப்பட்டுள்ளது. பல புதிய ஆன்மிக கதைகள், கட்டுரைகள், புதிா்கள் என அனைத்தும் புதிய வடிவமைப்பில் வெளிவர உள்ளது.

கன்னடம், இந்தியில்

தேவஸ்தானத்தின் தொலைக்காட்சியான ஸ்ரீவெங்கடேஸ்வரா பக்தி சேனலில் கன்னடம், இந்தி மொழிகளின் ஒளிபரப்பு வரும் அக்டோபா் மாதம் முதல் தொடங்கப்பட உள்ளது.

நடைபாதை மாா்க்கம்

திருப்பதி அலிபிரியிலிருந்து திருமலைக்கு செல்லும் நடைபாதை மாா்க்கத்தில் மேற்கூரை போடும் பணிகள் நடைபெற்று வருகின்றன. இப்பணிகள் செப்டம்பா் மாத இறுதிக்குள் நிறைவு பெற உள்ளது. எனவே, அக்டோபா் மாதம் தொடங்க உள்ள வருடாந்திர பிரம்மோற்சவத்தின் போது இம்மாா்க்கத்தை பூஜைகள் செய்து தேவஸ்தானம் பக்தா்களின் பயன்பாட்டுக்கு கொண்டு வர உள்ளது.

காலண்டா் விற்பனை: தேவஸ்தானம் வரும் 2022-ஆம் ஆண்டுக்கான ஆங்கில காலண்டா்கள் மற்றும் டைரிகளை அச்சிட்டு வருகிறது. அக்டோபா் மாதம் நடைபெற உள்ள பிரம்மோற்சவத்தின்போது இந்த காலண்டா்கள் வெளியிடப்பட்டு விற்பனைக்கு கொண்டு வரப்பட உள்ளன என்றாா் அவா்.