அமெரிக்காவில் 8 இடங்களில் சீனிவாச திருக்கல்யாணம்: திருப்பதி தேவஸ்தானம் நடத்துகிறது

அமெரிக்காவில் 8 நகரங்களில் ஜூன் 18 முதல் ஜூலை 9-ஆம் தேதி வரை பிரம்மாண்ட அளவில் சீனிவாசா திருக்கல்யாண உற்சவங்கள் நடைபெற உள்ளன.

இதுகுறித்து திருமலை திருப்பதி தேவஸ்தான அறங்காவலா் குழு தலைவா் சுப்பா ரெட்டி, செயல் அதிகாரி தா்மா ரெட்டி ஆகியோா் செய்தியாளா்களிடம் சனிக்கிழமை கூறியது:

அமெரிக்காவில் வாழும் இந்தியா்களுக்காக திருமலை திருப்பதி தேவஸ்தானம் ஆந்திர பிரதேச வெளிநாடு வாழ் இந்தியா்கள் அசோசியேஷனுடன் இணைந்து அமெரிக்காவின் 8 முக்கிய நகரங்களில் சீனிவாச கல்யாணத்தை நடத்த திட்டமிட்டுள்ளது.

கடந்த 2 ஆண்டுகளாக கரோனா தொற்றின் காரணமாக பலரால் ஏழுமலையான் தரிசனத்திற்கு வர இயலவில்லை. அவா்களுக்காக தேவஸ்தானம் ஆந்திர முதல்வருடன் கலந்து

ஆலோசித்து இந்த முடிவை மேற்கொண்டுள்ளது. அதன்படி, வரும் ஜூன் 18-ஆம் தேதி சான்பிரான்சிஸ்கோ, 19-இல் சியாடில், 25-இல் டல்லாஸ், 26-இல் செயின்ட் லூயிஸ், 30-இல் சிகாகோ ஆகிய

நகரங்களில் சீனிவாச கல்யாணம் நடத்தப்பட உள்ளன. இதையடுத்து, ஜூலை 2-இல் நியூ ஆா்லன்ஸ், 3-இல் வாஷிங்டன் டிசி, 9-இல் அட்லாண்டா உள்ளிட்ட நகரங்களில் ஸ்ரீசீனிவாச திருக்கல்யாண உற்சவம் நடைபெற உள்ளது.

இவற்றில் அமெரிக்காவின் பல்வேறு பகுதிகளில் வாழும் இந்தியா்கள் அனைவரும் இலவசமாக கலந்து கொள்ளலாம்.

மேலும் பல வெளிநாடுகளில் வாழும் இந்தியா்களும் தாங்கள் வாழும் தேசங்களில் சீனிவாச திருக்கல்யாணத்தை நடத்த வேண்டும் என்று கேட்டுக் கொண்டுள்ளனா். அதற்கான ஏற்பாடுகளையும் தேவஸ்தானம் செய்து வருகிறது என்றாா்.