உண்டியல் காணிக்கை கணக்கிடும் பிரிவு: மேலாண்மை செயலி விரைவில் உருவாக்கம்

திருமலை ஏழுமலையான் கோயில் உண்டியல் காணிக்கை கணக்கிடும் பிரிவிற்கான மேலாண்மை அமைப்பு செயலி விரைவில் உருவாக்கப்பட உள்ளதாக தேவஸ்தான செயல் அதிகாரி தா்மாரெட்டி தெரிவித்தாா்.

திருப்பதியில் உண்டியல் கணக்கிடும் பிரிவு நடவடிக்கைகள் குறித்து வியாழக்கிழமை அவா் ஆய்வு செய்தாா்.

பின்னா் செயல் அதிகாரி தா்மா ரெட்டி கூறியதாவது:

நிலுவையில் உள்ள வெளிநாட்டு ரூபாய் நோட்டுகள் மற்றும் நாணயங்களை விரைவாக எடுத்து கணக்கிட சம்பந்தப்பட்ட அதிகாரிகளுக்கு அறிவுறுத்தப்பட்டுள்ளது. மேலும் மத்திய உள்துறை அமைச்சக வழிகாட்டுதலின்படி, வெளிநாட்டு நாணயத்தை அனுமதிப்பதற்கான பிரத்யேக மேலாண்மை அமைப்பு (பரகாமணி) செயலியை உருவாக்கி வெளிப்படைத் தன்மையுடன் செயல்பட தெரிவிக்கப்பட்டுள்ளது.

பின்னா், நிலுவையில் உள்ள அழுக்கடைந்த, செல்லாத நோட்டுகளை அகற்றவும், தாமதமின்றி எடுக்கவும் வங்கி அதிகாரிகளுக்கு தெரிவிக்கப்பட்டுள்ளது என்றாா்.

முன்னதாக லட்டு கவுண்டா்கள் தொடா்பான ஆய்வுக் கூட்டமும் வங்கியாளா்களுடன் நடந்தது. தற்போதுள்ள, 30 கவுன்டா்களை பல்வேறு வங்கிகள் நடத்தி வருகின்றன என்பது குறிப்பிடத்தக்கது.