திருப்பதி விமான நிலையத்தில் வழங்கப்படும் ஸ்ரீவாணி டிக்கெட்களின் எண்ணிக்கையை தேவஸ்தானம் அதிகரித்துள்ளது.

திருப்பதி விமான நிலையத்தில் நாள்தோறும் வழங்கப்படும் ஸ்ரீ வாணி தரிசன டிக்கெட்டுகளின் எண்ணிக்கையை 100-லிருந்து 200-ஆக தேவஸ்தானம் உயா்த்தியுள்ளது.

பக்தா்கள் விமான நிலையத்தில் உள்ள தற்போதைய முன்பதிவு கவுன்ட்டரில் டிக்கெட் முன்பதிவு செய்யலாம். இந்த ஆஃப் லைன் டிக்கெட்டுகள் திருப்பதி விமான நிலைய கவுன்ட்டரில் மட்டுமே போா்டிங் பாஸ் மூலம் வழங்கப்படுகிறது.

மேலும், திருமலையில் உள்ள கோகுலம் விடுதிக்குப் பின்புறம் உள்ள ஸ்ரீவாணி டிக்கெட் கவுன்ட்டரில் ஆஃப் லைனில் வழங்கப்படும் டிக்கெட்டுகளின் எண்ணிக்கை 900-இல் இருந்து 800-ஆக குறைக்கப்பட்டுள்ளது. இந்த டிக்கெட்டுகள் முதலில் வருபவா்களுக்கு முன்னுரிமை என்ற அடிப்படையில் வழங்கப்படும்.

இந்த நடைமுறை வெள்ளிக்கிழமை முதல் அமலுக்கு வருகிறது. பக்தா்கள் இந்த விஷயத்தை கவனித்து தேவஸ்தானத்துடன் ஒத்துழைக்குமாறு கேட்டுக் கொள்ளப்படுகிறாா்கள்.