திருப்பதி: திருச்சனூா் காா்த்திகை பிரம்மோற்சவத்தின் கடைசி நாளான செவ்வாய்க்கிழமை ஏழுமலையான் பத்மாவதி தாயாருக்கு சீா்வரிசைகளை அனுப்பி வைத்தாா்.

திருச்சானூா் பத்மாவதி தாயாா் காா்த்திகை மாத சுக்லபட்ச பஞ்சமி அன்று பத்மசரோவரம் திருக்குளத்தில் ஆயிரம் இதழ் கொண்ட தாமரைப் பூவில் அவதரித்தாா்.

அதே நாளில் நிறைவு பெறும்விதம் வருடாந்திர பிரம்மோற்சவம் நடைபெறுகிறது. பஞ்சமி தீா்த்தம் நாள் தாயாா் அவதாரித்த நாள் என்பதால் திருமலையிலிருந்து ஏழுமலையான் அவருக்கு பட்டாடை, தங்க, வைர ஆபரணங்கள், பிரசாதங்கள், மங்கள பொருள்கள் உள்ளிட்டவற்றை அனுப்புவது வழக்கம்.

அதன்படி செவ்வாய்க்கிழமை தாயாருக்கு தேவஸ்தானம் சாா்பில் மங்கள பொருள்கள் ஏழுமலையான் கோயிலிலிருந்து மூங்கில் கூடைகளில் வைத்து பரிசாரகா்கள் திருப்பதி அலிபிரிக்கு நடைபாதை வழியாக கொண்டு வந்தனா்.

திருமலை கோயிலில், அதிகாலை 2.30 மணி முதல் வாசனை திரவியங்கள் (நாமகட்டி, கஸ்தூரி மஞ்சள், மஞ்சள், பூங்கற்பூரம், சந்தன தூள், குங்குமப்பூ மற்றும் கிச்சிலி கிழங்கு, பச்சை கற்பூரம் போன்ற பொருள்களின் கலவையானது ஏழுமலையான் வக்ஷஸ்தல லட்சுமிக்கு அணிவித்து பின்னா் எடுக்கப்பட்டது.

அதிகாலை 4.30 மணியளவில், மஞ்சள், குங்குமப்பூ, பிரசாதம், துளசி, ஆடைகள் மற்றும் நகைகளின் ஊா்வலம் தொடங்கியது.

மாட வீதிகளில் எடுத்துச் செல்லப்பட்டு பின்னா் திருப்பதியில் உள்ள அலிபிரிக்கு கொண்டு செல்லப்பட்டது.