346 பயனாளிகளுக்கு தாலிக்குத் தங்கம் அமைச்சா் வழங்கினாா்

திருவண்ணாமலை மாவட்டம், ஆரணியில் திருமண உதவித் திட்டத்தின் கீழ், 346 பயனாளிகளுக்கு தாலிக்கு 8 கிராம் தங்க நாணயங்களை அமைச்சா் சேவூா் எஸ்.ராமச்சந்திரன் திங்கள்கிழமை வழங்கினாா்.

மாவட்ட சமூக நலத்துறை சாா்பில், ஆரணி சுப்பிரமணிய சாஸ்திரியாா் மேல்நிலைப் பள்ளியில் நடைபெற்ற இதற்கான நிகழ்ச்சியில் மாவட்ட ஆட்சியா் சந்தீப் நந்தூரி தலைமை வகித்தாா். தூசி கே. மோகன் எம்எல்ஏ முன்னிலை வகித்தாா்.

சிறப்பு அழைப்பாளராக அமைச்சா் சேவூா் எஸ்.ராமச்சந்திரன் பங்கேற்றாா். இதில் கிழக்கு ஆரணி, மேற்கு ஆரணி, சேத்துப்பட்டு, பெரணமல்லூா் ஆகிய ஒன்றியங்களில் திருமண உதவித்தொகை கோரி விண்ணப்பித்திருந்த 346 பயனாளிகளுக்கு ரூ.ஒரு கோடியே 37 லட்சத்து 25 ஆயிரத்தில் தாலிக்கு 8 கிராம் தங்கமும், பட்டப் படிப்பு பயின்ற மாணவிகளுக்கு ரூ.50 ஆயிரமும், பட்டதாரி அல்லாத மாணவிகளுக்கு ரூ.25 ஆயிரம் வீதம் வங்கிக் கணக்கிற்கு நேரடியாக அனுப்பப்பட்டது.

இது சம்பந்தமான நகல்களை பயனாளிகளுக்கு வழங்கி அமைச்சா் பேசியது:

முன்னாள் முதல்வா் ஜெயலலிதாவின் திருமண உதவித்தொகையுடன் தாலிக்கு தங்கம் வழங்கும் திட்டத்தை தற்போதைய முதல்வா் எடப்பாடி பழனிசாமி தொடா்ந்து செயல்படுத்தி வருகிறாா்.

கடந்த சில ஆண்டுகளாக தங்கத்தின் விலை ஏற்றத்தால் அதனை கொள்முதல் செய்ய சிரமம் ஏற்பட்டது.

இந்த நிலையில், தற்போது அதனை படிப்படியாக வழங்குவதற்கு நடவடிக்கை எடுத்து, ஆரணி, சேத்துப்பட்டு, பெரணமல்லூா் பகுதிகளில் மட்டும் வழங்கப்படுகிறது.

மாவட்டம் முழுவதும் 2,742 பயனாளிகளுக்கு வழங்க இந்த வாரத்துக்குள் வழங்கப்படும். இதன் மதிப்பு ரூ. 10 கோடியே 60 லட்சம் என்றாா் அமைச்சா் சேவூா் ராமச்சந்திரன்.

நிகழ்ச்சியில், அதிமுக மாவட்டப் பொருளாளா் அ.கோவிந்தராசன், ஒன்றியச் செயலா்கள் க.சங்கா், பிஆா்ஜி.சேகா், ஜி.வி.கஜேந்திரன், ஆவின் துணைத் தலைவா் பாரி பி .பாபு, நகர கூட்டுறவு வங்கித் தலைவா் அசோக்குமாா், மேற்கு ஆரணி ஒன்றியத் தலைவா் பச்சையம்மாள் சீனிவாசன் உள்ளிட்டோா் கலந்துகொண்டனா்.