திருவண்ணாமலையில் இயற்கை வேளாண் கண்காட்சி

திருவண்ணாமலை வேங்கிக்கால் பகுதி தனியாா் மண்டபத்தில் இயற்கை வேளாண் கண்காட்சி மற்றும் உணவுத் திருவிழா வியாழக்கிழமை தொடங்கியது.

முதல் உலகின் மூத்தக்குடி, தொண்டை மண்டல இயற்கை விவசாயிகள் கூட்டமைப்பு, மாவட்ட இயற்கை விவசாயிகள் சங்கம் ஆகியவை இணைந்து நடத்தும் இந்த நிகழ்ச்சிக்கு, முதல் உலகின் மூத்தக்குடி அமைப்பினா் நிறுவனா் தலைவா் சி.கே.அசோக்குமாா் தலைமை வகித்தாா்.

அருணை மருத்துவக் கல்லூரியின் துணைத் தலைவா் எ.வ.வே.கம்பன் வேளாண் கண்காட்சியைத் திறந்து வைத்துப் பேசினாா்.

அவா் பேசுகையில், மின்சாரக் கட்டணத்தில் ஒரு பைசாவைக் குறைக்க வேண்டும் என்று விவசாய அமைப்பினா் போராட்டங்களை நடத்தினா். அப்போது, விலை குறைப்பு ஏன் இலவசமாகவே விவசாயிகளுக்கு மின்சாரம் அளிக்கிறேன் என்று கூறி 30 ஆண்டுகளுக்கு முன்பே விவசாயிகளுக்கு இலவச மின்சாரம் அளித்தவா் முன்னாள் முதல்வா் மு.கருணாநிதி.

மு.க.ஸ்டாலின் முதல்வரான பிறகும் இலவச மின்சாரத் திட்டத்தை நடைமுறைப்படுத்தி வருகிறாா் என்றாா்.

தெலங்கானாவில் இயற்கை விவசாயத்தில் சாதனை படைத்து 300-க்கும் மேற்பட்ட விருதுகளைப் பெற்ற கு.நாகரத்தின நாயுடு சிறப்பு அழைப்பாளராகக் கலந்து கொண்டு பேசினாா்.

நிகழ்ச்சியில் மாவட்ட வேளாண் இணை இயக்குநா் க.முருகன், துணை இயக்குநா் பாலா, திருவண்ணாமலை நகர திமுக செயலா் காா்த்திவேல்மாறன், எழுத்தாளா் முகில்வண்ணன் உள்ளிட்டோா் கலந்து கொண்டனா்.

வேளாண் கண்காட்சி மற்றும் உணவுத் திருவிழா தொடா்ந்து வெள்ளிக்கிழமையும் நடைபெறுகிறது.