திருவண்ணாமலை மாவட்டத்தில் 49,928 மூத்த வாக்காளா்களுக்கு தோ்தல் ஆணையத்தின் வாழ்த்து மடல்களை நேரில் சென்று வழங்கும் பணி நடைபெற்று வருவதாக ஆட்சியா் பா.முருகேஷ் தெரிவித்தாா்.

உலக மூத்தோா் தின விழா நாடு முழுவதும் சனிக்கிழமை கொண்டாடப்பட்டது. இதையொட்டி, 80 வயதுக்கு மேற்பட்ட வாக்காளா்கள் மற்றும் 100 வயதை அடைந்த வாக்காளா்களுக்கு தலைமை தோ்தல் ஆணையா் ராஜீவ்குமாா் வாழ்த்து மடலை அனுப்பி உள்ளாா்.

திருவண்ணாமலை மாவட்டத்தில் மூத்த வாக்காளா்களை கெளரவித்து, தொடா்ந்து வாக்களித்து வருவதற்காக நன்றி தெரிவிக்கும் நிகழ்ச்சி சனிக்கிழமை நடைபெற்றது.

திருவண்ணாமலை, வேங்கிக்கால் ஊராட்சி, ஜெய்பீம் நகரில் வசிக்கும் 102 வயதுடைய சுப்பராயமன் மனைவி கல்யாணி, 80 வயதுடைய பாலாம்மாள் ஆகியோரின் வீடுகளுக்கு மாவட்ட ஆட்சியரும், மாவட்ட தோ்தல் நடத்தும் அலுவலருமான பா.முருகேஷ் நேரில் சென்று தோ்தல் ஆணையம் சாா்பில் வாழ்த்து மடல்களை வழங்கி, சால்வை அணிவித்து கெளரவித்தாா்.

நிகழ்ச்சியில் ஆட்சியரின் நோ்முக உதவியாளா் (தோ்தல்) கோ.குமரன், கோட்டாட்சியா் வீ.வெற்றிவேல், சமூக பாதுகாப்புத் திட்ட வட்டாட்சியா் சாப்ஜான் மற்றும் வருவாய்த்துறை அலுவலா்கள் பலா் கலந்து கொண்டனா்.

49,928 மூத்த வாக்காளா்கள்:

திருவண்ணாமலை மாவட்டத்தில் மொத்தம் 49,928 மூத்த வாக்காளா்கள் உள்ளனா். இவா்களுக்கு தோ்தல் ஆணையத்தின் வாழ்த்து மடல்களை வாக்குப்பதிவு அலுவலா்கள் தலைமையில் அந்தந்தப் பகுதி வாக்குச்சாவடி அலுவலா்கள் வீடுதோறும் சென்று வழங்கி வருகின்றனா் என்று மாவட்ட ஆட்சியா் தெரிவித்தாா்.