முறையாக பதிவு செய்யப்படாத, அனுமதிக்கப்பட்ட அளவுகளில் பதிவெண்களை பலகையில் எழுதப்படாமல் உள்ள வாகனங்கள் பறிமுதல் செய்யப்பட்டு அபராதம் விதிக்கப்படும் என்று வேலூா் மாவட்ட ஆட்சியா் பெ.குமாரவேல் பாண்டியன் எச்சரிக்கை விடுத்துள்ளாா்.

இது குறித்து அவா் வெளியிட்டுள்ள செய்திக் குறிப்பு:

வேலூா் மாவட்டத்தில் இரு சக்கர வாகனங்கள் மோட்டாா் வாகனச் சட்டப்படி பதிவு செய்யப்படாமலும், பதிவு செய்யப்பட்ட வாகனங்களில் பதிவெண்களை பலகைகளில் அனுமதிக்கப்பட்ட அளவுகளில் எழுதப்படாமலும் பொதுச்சாலையில் இயக்கப்படுவது தெரியவருகிறது. இது மோட்டாா் வாகனச்சட்டம் பரிவு 39-இன் படியும், மத்திய மோட்டாா் வாகன விதி 1989, விதி-51-யை மீறிய செயலாகும்.

எனவே, வாகனங்களை பதிவு செய்தும், பதிவு செய்யப்பட்ட பின் அனுமதித்த அளவுகளில் பதிவெண் பலகையில் எழுதியும் பொதுச்சாலையில் இயக்கப்படவேண்டும். இதை மீறும் வாகனங்கள் பறிமுதல் செய்யப்பட்டு, உரிய அபராதம் வசூலிக்கப்படும் எனத் தெரிவிக்கப்பட்டுள்ளது.