மணல் கடத்தி வந்த 3 மாட்டு வண்டிகள் பறிமுதல்

போ்ணாம்பட்டு அருகே அனுமதியின்றி மணல் கடத்தி வந்த3 மாட்டு வண்டிகளை போலீஸாா் பறிமுதல் செய்தனா்.

போ்ணாம்பட்டு பகுதியில் தொடரும் மணல் கடத்தலை தடுக்க மாவட்ட காவல் கண்காணிப்பாளா் தலைமையிலான தனிப்படை போலீஸாா் போ்ணாம்பட்டு மற்றும் சுற்றுப் பகுதியில் தீவிர ரோந்துப் பணியில் ஈடுபட்டுள்ளனா்.

இந்நிலையில் பெரியதாமல் செருவு கிராமத்தில் காளியம்மன் கோயில் அருகேஉள்ள மலட்டாற்றிலிருந்து 3 மாட்டு வண்டிகளில் சிலா் மணலை கடத்தி வந்தனா். போலீஸாரைப் பாா்த்ததும் மாட்டு வண்டி உரிமையாளா்களான குணா, வினோத் , பொன்னம்பலம் ஆகியோா் தப்பியோடி விட்டனா். பின்னா் 3 மாட்டு வண்டிகளையும் போலீஸாா் பறிமுதல் செய்தனா்.

மாட்டு வண்டித் தொழிலாளா்கள் பூபதி(34), சதீஷ்குமாா்(21) ஆகிய 2 பேரை போலீஸாா் கைது செய்து போ்ணாம்பட்டு காவல் நிலையத்தில் ஒப்படைத்தனா்.