ஆனைகட்டியில் மாங்கரை அருகே உள்ள தோட்டத்தில் புகுந்த ஒற்றை யானை அங்கு அறுவடைக்குத் தயாராக இருந்த வாழைகளை சேதப்படுத்தியது.
ஆனைகட்டியில் ஆர்ஷா வித்யா குருகுலம் அருகே சிவகுமார் என்பவருக்குச் சொந்தமான வாழைத் தோட்டம் உள்ளது. காட்டு யானைகளின் தொந்தரவு இருப்பதால் உரிய அனுமதியுடன் தோட்டத்தைச் சுற்றி பாதுகாப்பு வேலி அமைத்துள்ளார். இந்நிலையில் பாதுகாப்பு வேலிகளை உடைத்து வீசி விட்டு தோட்டத்துக்குள் வியாழக்கிழமை இரவு நுழைந்த ஒற்றை யானை அறுவடைக்கு தயாராக இருந்த வாழைகளை சேதப்படுத்தியது. மேலும் தண்ணீர் குழாய்களையும் உடைத்தெறிந்தது.
தகவலறிந்த வந்த வனத் துறையினர் பட்டாசுகளை வெடித்து யானையை மீண்டும் காட்டுக்குள் விரட்டியடித்தனர். அதே யானை மீண்டும் வெள்ளிக்கிழமை தோட்டத்துக்குள் நுழைந்த மீதமிருந்த வாழைகளையும் சேதப்படுத்தியது.