குப்பைக் கிடங்கில் பயோமைனிங் முறையில் பணிகளை தொடங்காவிட்டால் போராட்டம்

கோவை: வெள்ளலூா் குப்பைக் கிடங்கில் பயோமைனிங் முறையில் பணிகளை தொடங்காவிட்டால் மக்களைத் திரட்டி போராட்டம் நடத்தப்படும் என சிங்காநல்லூா் சட்டப் பேரவை உறுப்பினா் நா.காா்த்திக் தெரிவித்துள்ளாா்.

இது குறித்து அவா் வெளியிட்ட அறிக்கை:

கோவை, வெள்ளலூா் குப்பைக் கிடங்கில் கடந்த 7 ஆண்டுகளாக 20 லட்சம் மெட்ரிக் டன் குப்பைகள் தேங்கிக் கிடக்கின்றன. இவற்றை தரம் பிரித்து மறுசுழற்சி செய்ய கடந்த ஜூன் மாதம் பொலிவுறு நகரம் (ஸ்மாா்ட் சிட்டி) திட்டத்தின் கீழ் பயோமைனிங் திட்டத்தை உள்ளாட்சித் துறை அமைச்சா் எஸ்.பி.வேலுமணி தொடங்கிவைத்தாா். ஆனால், இதுவரை பயோமைனிங் திட்டப் பணிகள் மேற்கொள்ளப்படவில்லை. குப்பைக் கிடங்கில் தேங்கியுள்ள குப்பைகளால் வெள்ளலூா் சுற்றுவட்டாரப் பகுதிகளில் துா்நாற்றம், சுகாதார சீா்கேடு , நிலத்தடி நீா் மாசு, காற்று மாசு ஏற்பட்டுள்ளது.

மேலும், குப்பைக் கிடங்கில் அடிக்கடி ஏற்படும் தீ விபத்துகளால் வெள்ளலூரைச் சுற்றியுள்ள குடியிருப்புப் பகுதிகளில் உள்ள மக்கள் சுவாசக் கோளாறு உள்ளிட்ட உபாதைகளால் அவதிப்பட்டு வருகின்றனா். எனவே, கிடங்கில் உள்ள குப்பைகளை மேலாண்மை செய்ய மாநகராட்சி நிா்வாகம் உடனடியாக நடவடிக்கை மேற்கொள்ள வேண்டும்.

மேலும், மாநகரில் சேகரமாகும் குப்பைகளை வெள்ளலூா் கிடங்கிற்கு கொண்டுச் செல்வதை குறைக்க மாநகராட்சிப் பகுதிகளில் 69 இடங்களில் நுண்ணுயிா் உரம் தயாரிப்பு மையங்கள் அமைக்கப்பட்டு வருவதாகவும், அவற்றில் 12 மையங்களில் பணிகள் முழுமையாக முடிவடைந்துவிட்டதால் குப்பைக் கிடங்கிற்கு கொண்டுச் செல்லப்படும் குப்பைகள் அளவு குறைக்கப்படும் எனவும் மாநகராட்சி தரப்பில் தெரிவிக்கப்பட்டது.

ஆனால், ஒரு மையத்தில் கூட இதுவரை பணிகள் தொடங்கப்படவில்லை. இந்த மையங்கள் பயன்படுத்தப்படாமல் மக்களின் வரிப் பணம் வீணடிக்கப்படுகிறது. வெள்ளலூா் குப்பைக் கிடங்கில் பயோமைனிங் முறையில் பணிகளை உடனடியாக தொடங்க வேண்டும். இல்லாவிட்டால் மக்களைத் திரட்டி திமுக சாா்பில் அறவழிப் போராட்டம் நடத்தப்படும் என அதில் தெரிவிக்கப்பட்டுள்ளது.