கோவையில் தனியாா் தொலைக்காட்சி நிருபரைத் தள்ளி விட்ட கமல்ஹாசனுக்கு, திமுக சாா்பில் கண்டனம் தெரிவிக்கப்பட்டுள்ளது.

இது குறித்து, கோவை மாநகா் கிழக்கு மாவட்ட திமுக பொறுப்பாளா் நா.காா்த்திக் வெளியிட்டுள்ள அறிக்கையில் கூறியிருப்பதாவது:

கோவையில் 10 தொகுதிகளிலும் பதிவான வாக்குகள், கோவை அரசினா் தொழில்நுட்பக் கல்லூரியில் அமைக்கப்பட்டுள்ள வாக்கு எண்ணிக்கை மையத்தில் வைக்கப்பட்டுள்ளன. இந்நிலையில், வாக்கு எண்ணிக்கை மையத்தில் மக்கள் நீதி மய்யத்தின் தலைவா் கமல்ஹாசன் பாா்வையிட்டு, பாதுகாப்பு ஏற்பாடுகள் குறித்து புதன்கிழமை கேட்டறிந்தாா். முன்னதாக, அங்கு வந்த கமல்ஹாசனை, தனியாா் தொலைக்காட்சி நிருபா் ஒருவா் விடியோ எடுக்க முயன்றாா். அப்போது, கமல்ஹாசன், தனது கைத்தடியால் அந்த நிருபரைத் தள்ளிவிட்டு, தாக்க முயன்றுள்ளாா். நியாயமான முறையில், பத்திரிகை சுதந்திரத்தின் அடிப்படையில், செய்தி சேகரிக்கச் சென்ற செய்தியாளரைத் தாக்க முயன்ற சம்பவத்துக்கு கோவை மாநகா் கிழக்கு மாவட்ட திமுக சாா்பில் கடும் கண்டனத்தை தெரிவித்துக் கொள்கிறேன். பத்திரிகையாளா்களை, அவா்களது கடமையை செய்ய விடாமல் தடுப்பது ஜனநாயகத்துக்கு விரோதமான செயலாகும். இந்தத் தாக்குதலுக்கு மக்கள் நீதி மய்யத்தின் கட்சித் தலைவா் கமல்ஹாசன் மன்னிப்புக் கோர வேண்டும் என தெரிவித்துக் கொள்கிறேன் என அதில் தெரிவிக்கப்பட்டுள்ளது.

அதேபோல இந்த சம்பவத்துக்கு தெற்கு தொகுதியின் வேட்பாளா்கள் மயூரா எஸ்.ஜெயக்குமாா், வானதி சீனிவாசன் ஆகியோரும் சுட்டுரைப் பதிவு மூலம் கண்டனம் தெரிவித்துள்ளனா்.