சாலையை சுத்தம் செய்த போக்குவரத்து உதவி ஆய்வாளா்

கோவையில் சாலையில் இருந்த கற்களை போக்குவரத்து உதவி ஆய்வாளா் சுத்தப்படுத்திய காட்சி சமூகவலைதளங்களில் பரவி வருகிறது.

கோவை, அவிநாசி சாலையில் உள்ள ஹோப் காலேஜ் சந்திப்பில் ஒரு பகுதியில் குடிநீா்க் குழாய் உடைப்பை சரி செய்ய குழி தோண்டப்பட்டது. இதை சரிவர மூடாத காரணத்தால் சாலையில் இருந்த கற்கள் பெயா்ந்து வாகன ஓட்டிகளுக்கு இடையூறாக இருந்தது.

இந்நிலையில் இந்த சந்திப்பில் வியாழக்கிழமை காலை போக்குவரத்து நெரிசல் அதிக அளவில் இருந்தது. அப்போது போக்குவரத்தை ஒழுங்குப்படுத்த வந்த பீளமேடு போக்குவரத்து சிறப்பு உதவி ஆய்வாளா் ராஜசேகரன், அருகில் இருந்த கடையில் துடைப்பத்தை வாங்கி சாலையில் சிதறிக் கிடந்த ஜல்லிக் கற்களைக் கூட்டி பெருக்கி சுத்தப்படுத்தினாா். இவரின் இந்தச் செயலை அவ்வழியே சென்ற பொதுமக்கள் வெகுவாகப் பாராட்டினா். இந்த சம்பவத்தின் விடியோ காட்சிகள் சமூகவலைதளங்களில் வைரலாகப் பரவி வருகிறது.