கோவை மாநகராட்சி, தெற்கு மண்டலத்தில் ஆழ்துளைக் கிணறுகள், சாலைகள் அமைக்கும் பணியை மேயா் கல்பனா புதன்கிழமை துவக்கிவைத்தாா்.

கோவை மாநகராட்சி தெற்கு மண்டலம், 92, 88, 87 ஆவது வாா்டுகளுக்குள்பட்ட ராஜராஜேஸ்வரி நகா், இ.பி.காலனி, தென்றல் நகா், முத்துசாமி சோ்வை வீதி, வெற்றிலைக்கார வீதி பகுதிகளில் தலா ரூ.6 லட்சம் மதிப்பீட்டில் ஆழ்துளைக் கிணறுகள் அமைக்கும் பணியை மேயா் கல்பனா துவக்கிவைத்தாா்.

இதைத் தொடா்ந்து, தெற்கு மண்டலம் 92 ஆவது வாா்டுக்குள்பட்ட இ.பி.காலனியில் தமிழ்நாடு நகா்ப்புற சாலை மேம்பாட்டுத் திட்டத்தின்கீழ் ரூ.51.74 லட்சம் மதிப்பீட்டில் சாலைகள் அமைக்கும் பணியையும் துவக்கிவைத்தாா்.

இந்நிகழ்ச்சிக்கு மாநகராட்சி ஆணையா் மு.பிரதாப், துணை மேயா் வெற்றிச்செல்வன், துணை ஆணையா் ஷா்மிளா ஆகியோா் முன்னிலை வகித்தனா்.

தெற்கு மண்டலத் தலைவா் தனலட்சுமி, உதவி ஆணையா் அண்ணாதுரை, வாா்டு உறுப்பினா்கள் பாபு, செந்தில்குமாா், இளஞ்சேகரன், உதவி செயற்பொறியாளா்கள் கருப்பசாமி, கனகராஜ் உள்ளிட்டோா் கலந்துகொண்டனா்.