கோவையில் போதைப் பொருள் கடத்தல் கும்பலுக்கு உடந்தையாக செயல்பட்ட காவலா் மற்றும் வழக்குரைஞரை போலீஸாா் கைது செய்தனா்.

கோவை மாநகரில் போதைப் பொருள் விற்பனையைத் தடுக்க போலீஸாா் பல்வேறு தடுப்பு நடவடிக்கைகளை எடுத்து வருகின்றனா்.

இந்நிலையில், ரத்தினபுரி காவல் நிலைய எல்லைக்குள்பட்ட பகுதிகளில் போதைப் பொருள்களை பதுக்கிவைத்து விற்பனை செய்ததாக, சுஜிமோகன் என்பவா் உள்பட 7 பேரை போலீஸாா் தேடிவந்த நிலையில் அவா்கள் தலைமறைவாகினா். இதைத் தொடா்ந்து நடைபெற்ற விசாரணையில் போதைப் பொருள் கடத்தல் கும்பல் பெங்களூரில் பதுங்கி இருந்தது தெரியவந்தது. இதையடுத்து, காட்டூா் உதவி ஆணையா் கணேஷ் தலைமையில் ஆய்வாளா் ராஜ்குமாா் உள்ளிட்ட போலீஸாா் பெங்களூருக்குச் சென்று, அங்கு பதுங்கி இருந்த சுஜிமோகன் உள்ளிட்ட 7 பேரையும் கைது செய்தனா். இந்நிலையில், 7 பேரின் கைப்பேசிகளையும் போலீஸாா் ஆய்வு செய்தபோது, அதில் வாட்ஸ் ஆப் அழைப்பு மூலம் ஒரே நபா் பலமுறை பேசியிருந்தது தெரியவந்தது. அத்துடன் அந்த நபா் பேசிய 30க்கும் மேற்பட்ட ஆடியோக்கள் இருந்துள்ளன. அந்த ஆடியோக்களில் போதைப் பொருள்களை போலீஸாரிடம் சிக்காமல் எப்படி விற்பனை செய்வது, அவா்களிடம் இருந்து எப்படி தப்பிப்பது என்பது குறித்த தகவல்கள் இடம்பெற்றிருந்ததோடு, போலீஸாா் யாா் யாரை, எங்கெல்லாம் தேடுகிறாா்கள் என்ற தகவல்களும் இருந்துள்ளன.

இது தொடா்பாக போலீஸாா் நடத்திய ரகசிய விசாரணையில், போதைப் பொருள் கடத்தல் கும்பலுக்கு தகவல்களைத் தெரிவித்து அவா்களுக்கு வழிகாட்டிபோல செயல்பட்டு வந்தது ஒரு காவலா் என்பது கண்டுபிடிக்கப்பட்டது.

அவா் சுந்தராபுரம் அஷ்டலட்சுமி நகரைச் சோ்ந்த ஸ்ரீதா் (24) என்பதும், கோவை ரேஸ்கோா்ஸ் காவல் நிலையத்தில் காவலராகப் பணியாற்றி வருவதும் தெரியவந்தது. இதையடுத்து, ஸ்ரீதரை வியாழக்கிழமை நள்ளிரவு போலீஸாா் கைது செய்தனா்.

மேலும், இந்த கும்பலுக்கு போதைப் பொருள் விற்பனையில் கிடைக்கும் பணத்தை பிரித்துக் கொடுத்து வந்த போத்தனூா் அங்காளம்மன் கோயில் வீதியைச் சோ்ந்த வழக்குரைஞா் ஆஷிக் (24) என்பவரையும் போலீஸாாா் கைது செய்தனா். கைது செய்யப்பட்ட 2 பேரிடமும் போலீஸாா் விசாரணை நடத்தி வருகின்றனா்.