கோவை: மகளிா் இட ஒதுக்கீடு மசோதா நிச்சயம் அமல்படுத்தப்படும் என பாஜக தேசிய மகளிரணித் தலைவா் வானதி சீனிவாசன் தெரிவித்தாா்.

கோவையில் செய்தியாளா்களிடம் அவா் திங்கள்கிழமை கூறியதாவது:

தில்லியில் 5 மாநில சட்டப் பேரவைத் தோ்தல் தொடா்பான மத்திய தோ்தல் குழு கூட்டம் நடைபெற்றது. இதில், தேசிய தலைமையின் முக்கிய தலைவா்களுடன் அந்த மாநிலங்களில் மேற்கொள்ளப்பட வேண்டியவை குறித்து விவாதிக்கப்பட்டது.

முன்னாள் மத்திய நிதியமைச்சா் ப.சிதம்பரம் 33 சதவீத இட ஒதுக்கீடு மசோதா தொடா்பாக காங்கிரஸில் உள்ள மனநிலையிலேயே இருக்கிறாா். தற்போது நடப்பது பாஜக ஆட்சி. மகளிா் சட்ட மசோதாவை கொண்டு வந்திருப்பவா் பிரதமா் நேரந்திர மோடி. மகளிா் இட ஒதுக்கீடு மசோதவை தோ்தல் நாடகம் என்று கூறுவது தவறானது. மகளிா் இட ஒதுக்கீடு மசோதா நிச்சயம் அமல்படுத்தப்படும்.

அண்மையில் நடைபெற்ற ஜி 20 மாநாட்டில் கலந்து கொண்ட உலகத் தலைவா்களுக்கு நமது நாட்டில் தயாரான பாரம்பரிய பொருள்களையே பிரதமா் பரிசளித்தாா். இதேபோல நாமும் நமது நாட்டில் தயாராகும் பொருள்களை வாங்க முன்னுரிமை அளிக்க வேண்டும். உள்ளூரில் தயாரிக்கப்படும் பொருள்களுக்கு முக்கியத்துவம் கொடுக்க வேண்டும்.

நாட்டில் கதா் மற்றும் கைவினைப் பொருள்களின் விற்பனை ரூ.33,000 கோடியிலிருந்து 1.34 லட்சம் கோடியாக கடந்த 9 ஆண்டுகளில் உயா்ந்துள்ளது. இதனால், இந்தியாவில் தயாரிக்கக் கூடிய பொருள்களுக்கும், உள்ளூா் பொருள்களுக்கும் ஆதரவு கொடுப்போம். இதன்மூலம் உலக நாடுகள் பட்டியலில் இந்திய பொருள்களுக்கான தனித்துவமான சந்தையை உருவாக்குவதோடு நாட்டின் முன்னேற்றமும் உறுதிப்படுத்தப்படுகிறது.

வாய்ப்பு கிடைக்கும்போதெல்லாம் சா்வதேச விலை நிலவரத்தை வைத்து சமையல் எரிவாயு விலையைக் குறைக்க மத்திய அரசு முயற்சி செய்து வருகிறது என்றாா்.