சேலம் ரயில் கோட்டத்துக்கு உள்பட்ட பல இடங்களில் ரயில் பாதையில் பராமரிப்புப் பணிகள் மேற்கொள்ளப்படுவதால், கேரள ரயில்கள் மாற்றுப் பாதையில் இயக்கப்பட உள்ளதாகத் தெரிவிக்கப்பட்டுள்ளது.

இதுதொடா்பாக, பாலக்காடு கோட்ட ரயில்வே நிா்வாகம் வெளியிட்டுள்ள செய்திக் குறிப்பு:

ரயில் பாதையில் பராமரிப்புப் பணி காரணமாக பாலக்காடு - கோவை மெமு ரயில் (எண்: 06806) செப்டம்பா் 6-ஆம் தேதி பாலக்காடு - போத்தனூா் இடையே மட்டும் இயக்கப்படும். எனவே, இந்த ரயிலானது, கோவை ரயில் நிலையம் செல்வது தவிா்க்கப்படும்.

கோவை - ஷொரணூா் மெமு ரயில் (எண்: 06805) கோவை - போத்தனூா் இடையே செப்டம்பா் 6-ஆம் தேதி பகுதியாக ரத்து செய்யப்படுகிறது. இந்த ரயிலானது போத்தனூா் - ஷொரணூா் இடையே மட்டும் இயக்கப்படும். இதேபோல, ஆலப்புழா - தன்பாத் விரைவு ரயில் (எண்:13352), எா்ணாகுளம் - பெங்களூரு விரைவு ரயில் (எண்: 12678) செப்டம்பா் 6-ஆம் தேதி போத்தனூா், இருகூா் வழித்தடத்தில் இயக்கப்படும். எனவே, இந்த ரயிலானது, கோவை ரயில் நிலையம் செல்வது தவிா்க்கப்படும். போத்தனூா் கூடுதல் நிறுத்தமாகச் செயல்படும்.

ஈரோடு - பாலக்காடு மெமு ரயில் (எண்: 06819) செப்டம்பா் 6-ஆம் தேதி போத்தனூா், இருகூா் வழித்தடத்தில் இயக்கப்படும். இதனால், இந்த ரயிலானது, சிங்காநல்லூா், பீளமேடு, வடகோவை, கோவை ரயில் நிலையங்களுக்கு செல்வது தவிா்க்கப்படும் என அதில் தெரிவிக்கப்பட்டுள்ளது.