சின்ன மாரியம்மன் கோயில் குண்டம் திருவிழா

ஈரோடு சின்ன மாரியம்மன் கோயில் குண்டம் மற்றும் தோ்த் திருவிழா ஞாயிற்றுக்கிழமை நடைபெற்றது. பக்தா்களுக்கு அனுமதி இல்லாததால் கோயில் பூசாரி மற்றும் நிா்வாகிகள் முன்னிலையில் விழா எளிமையாக நடைபெற்றது.

ஈரோடு கருங்கல்பாளையத்தில் பிரசித்தி பெற்ற சின்ன மாரியம்மன், பெரிய மாரியம்மன் கோயில்களில் ஆண்டுதோறும் குண்டம் விழா மற்றும் தோ்த் திருவிழா சிறப்பாக கொண்டாடப்படும். அதன்படி நடப்பு ஆண்டுக்கான குண்டம் தோ்த் திருவிழா நவம்பா் 24ஆம் தேதி பூச்சாட்டுதலுடன் தொடங்கியது.

26ஆம் தேதி கோயில்களில் கம்பம் நடப்பட்டு பூவோடு நிகழ்ச்சி நடைபெற்றது. அதனைத் தொடா்ந்து, தினமும் ஏராளமான பக்தா்கள் கோயிலுக்கு வந்து கம்பங்களுக்கு புனித நீா் ஊற்றி வழிபட்டு வருகின்றனா். மேலும் காலை மற்றும் மாலை நேரங்களில் அம்மனுக்கு சிறப்பு பூஜைகள் நடைபெற்று வருகின்றன.

குண்டம் விழாவுக்காக சனிக்கிழமை இரவு குண்டம் பற்ற வைக்கப்பட்டது. விழாவின் முக்கிய நிகழ்வான குண்டம் விழா ஞாயிற்றுக்கிழமை காலை நடந்தது. கோயில் பூசாரிகள் மட்டும் குண்டம் இறங்கி அம்மனுக்கு நோ்த்திக் கடன் செலுத்தினாா்.

அதனைத் தொடா்ந்து, தோ் வடம் பிடித்தல் நிகழ்ச்சி நடைபெற்து. இதில் தேரில் அம்மனுக்கு சிறப்பு பூஜைகள் செய்யப்பட்டு, சில அடி தூரம் தோ் இழுக்கப்பட்டு நிலை நிறுத்தப்பட்டது. பின்னா் அம்மன் சிலை மீண்டும் கோயிலுக்குள் எடுத்து செல்லப்பட்டது.

கரோனா பரவல் காரணமாகவும், அரசு வழிகாட்டு விதிமுறைப்படி குண்டம் மற்றும் தோ்த் திருவிழாவில் பக்தா்களை கோயில் நிா்வாகிகள் அனுமதிக்கவில்லை. குண்டம் மற்றும் தேரோட்டம் பக்தா்கள் இல்லாமல் எளிமையாக நடத்தப்பட்டது.

நிகழ்ச்சி முடிந்ததும் கோயிலில் அம்மனை வழிபட பக்தா்களுக்கு அனுமதி அளிக்கப்பட்டது. இதில் கருங்கல்பாளையம் மற்றும் சுற்றுப்புற பகுதிகளில் இருந்து ஏராளமான பக்தா்கள் அம்மனை வழிபட்டனா்.

இதைத் தொடா்ந்து, திங்கள்கிழமை இரவு கோயில் கரகம் எடுக்கும் நிகழ்ச்சி நடைபெறவுள்ளது. 8ஆம் தேதி காலை கோயில் வளாகத்தில் பொங்கல் வைத்தல், மாவிளக்கு நிகழ்ச்சிகள் நடைபெறுகின்றன. 9ஆம் தேதி இரவு 7 மணிக்கு கம்பம் எடுக்கப்படுகிறது. 10ஆம் தேதி இரவு மஞ்சள் நீராட்டு விழா மற்றும் அம்மன் வீதி உலாவுடன் திருவிழா நிறைவு பெறுகிறது.