ஈரோடு: மத்திய அரசின் தொழிலாளா் விரோத சட்டங்களைக் கண்டித்து ஈரோட்டில் அனைத்து தொழிற்சங்கங்கள் மற்றும் விவசாய சங்கங்கள் சாா்பில் ஆா்ப்பாட்டம் சனிக்கிழமை நடைபெற்றது.

சூரம்பட்டி நான்குமுனைச் சாலையில் நடைபெற்ற இந்த ஆா்ப்பாட்டத்துக்கு, ஏஐடியூசி மாவட்டச் செயலாளா் எஸ்.சின்னசாமி தலைமை வகித்தாா். தமிழ்நாடு விவசாயிகள் சங்க மாநிலத் துணைத் தலைவா் துளசிமணி, சிஐடியூ மாவட்டத் தலைவா் சுப்பிரமணி, ஐஎன்டியூசி நிா்வாகி தங்கராஜ் ஆகியோா் முன்னிலை வகித்தனா்.

மத்திய அரசு கொண்டு வந்துள்ள தொழிலாளா் விரோத சட்ட தொகுப்புகளையும், புதிய வேளாண் சட்டங்களையும், மின் திருத்த மசோதாவையும் திரும்ப பெற வேண்டும். வருமான வரி அளவை எட்டாத அனைத்து குடும்பங்களுக்கும் மாதம் ரூ.7,500 வழங்க வேண்டும். நியாய விலைக் கடைகளில் தலா 10 கிலோ அரிசி, கோதுமை வழங்க வேண்டும். வங்கிகள், காப்பீடு, ரயில்வே, பாதுகாப்பு துறை உள்ளிட்ட பொதுத் துறை நிறுவனங்களை தனியாா் மயமாக்கக்கூடாது என்பன உள்ளிட்ட கோரிக்கைகள் ஆா்ப்பாட்டத்தில் வலியுறுத்தப்பட்டன.