புதுப்பிக்கப்பட்ட வகுப்பறை மாணவா்கள் பயன்பாட்டுக்கு ஒப்படைப்பு

 சென்னிமலையை அடுத்த கிட்டாம்பாளையம் அரசு துவக்கப் பள்ளியில் ஆற்றல் ஃபவுண்டேஷன் சாா்பில், வகுப்பறைக் கட்டடம் புதுப்பிக்கப்பட்டு மாணவா்கள் பயன்பாட்டுக்கு ஒப்படைக்கும் நிகழ்ச்சி வெள்ளிக்கிழமை நடைபெற்றது.

விழாவுக்கு, கிட்டாம்பாளையம் ஊராட்சித் தலைவா் தங்கவேல் தலைமை வகித்தாா். பள்ளித் தலைமை ஆசிரியா் வெள்ளிங்கிரி வரவேற்றாா்.

தொடா்ந்து, ஆற்றல் ஃபவுண்டேஷன் நிா்வாகி அசோக் பேசியதாவது:

அரசுப் பள்ளிகளை மக்கள் அனைவரும் நமது பள்ளி என்ற உணா்வோடு கருதி பள்ளிக் குழந்தைகளின் தேவைகளை அறிந்து உதவ வேண்டும். ஆற்றல் ஃபவுண்டேஷன் அமைப்பானது ஈரோடு, திருப்பூா் மாவட்டத்தில் உள்ள அரசுப் பள்ளிகளுக்குத் தேவையான அடிப்படை உள்கட்டமைப்பு, இதர தேவைகளை ஆய்வு செய்து அதைப் பூா்த்தி செய்வதில் அதிக கவனம் செலுத்தி வருகிறது என்றாா்.

இதில், எக்கட்டம்பாளையம் ஊராட்சித் துணைத் தலைவா் செந்தில், வாா்டு உறுப்பினா்கள், பள்ளி மேம்பாட்டுக் குழுத் தலைவா் சிவகாமி, பெற்றோா் ஆசிரியா் கழகத் தலைவா் நாகராஜன் உள்ளிட்டோா் கலந்துகொண்டனா்.