தாராபுரம் அரசு மருத்துவமனையை தரம் உயா்த்துவது தொடா்பாக ஆதிதிராவிடா் நலத் துறை அமைச்சா் என்.கயல்விழி செல்வராஜ் சனிக்கிழமை ஆய்வு மேற்கொண்டாா்.

தாராபுரத்தில் உள்ள அரசு மருத்துவமனையை தனியாருக்கு இணையான தரம் உயா்த்தப்பட்ட மருத்துவமனையாக மாற்றப்படும் என்று அத்தொகுதி சட்டப் பேரவை உறுப்பினரும், அமைச்சருமான என்.கயல்விழி செல்வராஜ் தோ்தல் வாக்குறுதி அளித்திருந்தாா். எனினும் தாராபுரம் அரசு மருத்துவமனையில் போதிய அளவு இடவசதி இல்லாததால், புறவழிச் சாலையில் அரசினா் தொழிற்பயிற்சி நிலையம் அருகில் தரம் உயா்த்தப்பட்ட மருத்துவமனை கட்டுவதற்காக ஆய்வு நடைபெற்றது.

இதனிடையே, தாராபுரத்துக்கு வரவிருந்த தரம் உயா்த்தப்பட்ட மருத்துவமனை காங்கயம் சட்டப் பேரவைத் தொகுதிக்கு மாற்றப்பட்டதால் பொதுமக்கள் அதிா்ச்சியடைந்திருந்தனா்.

இந்நிலையில், தாராபுரம் அரசு மருத்துவமனையில் அமைச்சா் என்.கயல்விழி செல்வராஜ் மருத்துவக் குழுவினருடன் சனிக்கிழமை ஆய்வு மேற்கொண்டாா்.

அப்போது மருத்துவமனையில் மேற்கொள்ளப்பட்ட வேண்டிய உள்கட்டமைப்பு வசதிகள், தேவையான மருத்துவ உபகரணங்கள், மருத்துவா்கள், செவிலியா்களின் எண்ணிக்கை உள்ளிட்ட விவரங்களைக் கேட்டறிந்தாா்.

இதன் பிறகு அவா் செய்தியாளா்களிடம் கூறியதாவது: திமுக தோ்தல் அறிக்கையின்போது இந்த மருத்துவமனையை தனியாா் மருத்துவமனைகளுக்கு இணையாக தரம் உயா்த்தப்படும் என்று வாக்குறுதி அளித்திருந்தேன்.

இந்த வாக்குறுதியை நிறைவேற்றும் வகையில் மருத்துவம் மற்றும் மக்கள் நல்வாழ்வுத் துறை அமைச்சா் மா.சுப்பிரமணியனை சந்தித்து கோரிக்கை மனு அளிக்கப்பட்டது. அப்போது தாராபுரம் அரசு மருத்துவனையில் ஆய்வுகள் மேற்கெண்டு தரம் உயா்த்தப்படுவதற்கான கட்டமைப்பு விரங்களைக் கேட்டுவர அறிவுறுத்தியன்பேரில் மருத்துவக் குழுவினருடன் ஆய்வு மேற்கொள்ளப்பட்டது.

இதில், தீவிர சிகிச்சைப் பிரிவில் 24 மணி நேரமும் நோயாளிகளுக்கு சிகிச்சை அளிக்கும் வகையில் மருத்துவா்களை நியமிக்க வேண்டும். மேலும், டயாலிசிஸ் சிகிச்சை அளிக்க பயிற்சி பெற்ற மருத்துவா்கள், பாம்புக் கடி, விஷம் குடித்தவா்களுக்கு சிகிச்சை அளிக்கவும், எலும்பு முறிவுக்கு சிகிச்சை அளிக்க மருத்துவ நிபுணா்களையும் நியமிக்க வேண்டும்.

மேலும், பொது அறுவை சிகிச்சை செய்யவும், சுழற்சி முறையில் பணியாற்றவும் அறுவை சிகிச்சை நிபுணா்களை நியமிக்க வேண்டும். தரம் உயா்த்தப்பட்ட ஆய்வகம் அமைக்க தனி கட்டடம் மற்றும் ஆய்வு நுட்புநா், தேவையான உபகரணங்கள் வழங்க நடவடிக்கை மேற்கொள்ளப்படும் என்றாா்.

ஆய்வின்போது அரசு மருத்துவா்கள், செவிலியா்கள் உள்ளிட்ட பலா் உடனிருந்தனா்.