அடிப்படை வசதிகளை நிறைவேற்றவில்லை எனக் கூறி, திருமுருகன்பூண்டி பேரூராட்சி நிர்வாகத்தைக் கண்டித்து தேவராயன்பாளையத்தில் இந்திய கம்யூனிஸ்ட் கட்சியினர் ஞாயிற்றுக்கிழமை ஆர்ப்பாட்டத்தில் 
ஈடுபட்டனர்.
இந்திய கம்யூனிஸ்ட் கட்சி சார்பில் திருமுருகன்பூண்டி பேரூராட்சிக்கு உள்பட்ட தேவராயன்பாளையம் நியாயவிலைக் கடை முன் நடைபெற்ற ஆர்ப்பாட்டத்துக்கு கிளைச் செயலாளர் அபுசாலி தலைமை வகித்தார்.
இதில், குடிநீர் இணைப்பு இல்லாத வீடுகளுக்கு உடனடியாக குடிநீர் இணைப்பு வழங்க வேண்டும். குடிநீர் விநியோகத்தை முறைப்படுத்தி வாரம் இருமுறை குடிநீர் வழங்க வேண்டும். முறைகேடாக வழங்கப்பட்ட குடிநீர் இணைப்புகளை முறைப்படுத்த வேண்டும். சொத்து வரி, குடிநீர்க் கட்டண உயர்வை உடனடியாக ரத்து செய்ய வேண்டும். 
தேவராயன்பாளையம் பகுதியில் உள்ள அனைத்து சாலைகளையும் உடனடியாகச் சீரமைக்க வேண்டும். தெருவிளக்குகளைச் சீரமைக்க வேண்டும் என்பன உள்ளிட்ட கோரிக்கைகள் வலியுறுத்தப்பட்டன.