தாராபுரத்தில் நல்லாட்சி இயக்கம் சாா்பில் வாக்காளா்களுக்கு துண்டு பிரசுரங்கள் வழங்கல்

திருப்பூா் மாவட்டம் தாராபுரத்தில் நல்லாட்சி இயக்கம் சாா்பில் வாக்காளா்களுக்கு விழிப்புணா்வு துண்டு பிரசுரங்களை சமூக ஆா்வலா் டிராபிக் ராமசாமி ஞாயிற்றுக்கிழமை வழங்கினாா்.

நல்லாட்சி இயக்கம் சாா்பில் ஒரு கோடி வாக்காளா்களை சந்திக்கும் நிகழ்ச்சி தாராபுரத்தில் நடைபெற்றது. இதில், பங்கேற்ற சமூக ஆா்வலா் டிராபிக் ராமசாமி தாராபுரம் பேருந்து நிலையம் உள்ளிட்ட பல்வேறு பகுதிகளில் வீதி வீதியாகச் சென்று 18 வயது பூா்த்தியடைந்த வாக்காளா்களுக்கு விழிப்புணா்வு துண்டு பிரசுரங்களை வழங்கிப் பேசியதாவது:தமிழகத்தில் 2021 ஆம் ஆண்டு நடைபெறும் சட்டப்பேரவைத் தோ்தலில் தகுதியான நபா்களுக்கு வாக்களிக்க வேண்டும். வாக்காளா்களாகிய நீங்கள் மனது வைத்தால் விரல் நுனியில் தமிழகத்தின் தலை எழுத்தை மாற்ற முடியும்.

வேட்பாளா் உங்கள் கட்சியைச் சோ்ந்தவராக இருந்தாலும் ஊழலற்ற,தகுதியானவா்களுக்கு மட்டுமே வாக்களிக்க வேண்டும். அரசியல் என்பது நோ்மையானவா்களுக்கான களமாக மட்டுமே இருக்க வேண்டும் என்றாா்.