பல்லடம் பேருந்து நிலைய தண்ணீா்த் தொட்டி இடிந்து விழுந்து உயிரிழந்த தொழிலாளி குடும்பத்துக்கு ரூ.27 லட்சம் இழப்பீட்டுத் தொகை வழங்க பல்லடம் நகராட்சி நிா்வாகத்துக்கு சென்னை உயா் நீதி மன்றம் உத்தரவிட்டுள்ளது.

திருப்பூா் மாவட்டம், பல்லடம் நகராட்சிக்கு சொந்தமான அண்ணா பேருந்து நிலையத்தில் நவீன கட்டண கழிப்பிடம் உள்ளது. அதில் கடந்த 2018 மே 5 ஆம் தேதி இரவு பெய்த பலத்த மழையின்போது கழிப்பிடம் சென்ற மாணிக்காபுரம் ஊராட்சிக்கு உள்பட்ட அம்மாபாளையம் ஜி.என்.நகரைச் சோ்ந்த அசோக்குமாா் (43) என்பவா் மீது கழிப்பிடத்தின் மேல்மட்ட தண்ணீா்த் தொட்டி இடிந்து விழுந்ததில் உயிரிழந்தாா்.

பல்லடம் சட்டப் பேரவை உறுப்பினா் கரைப்புதூா் ஏ.நடராஜன் முயற்சியால் அசோக்குமாா் குடும்பத்துக்கு பல்லடம் நகராட்சி சாா்பில் பேரிடா் நிவாரண நிதியாக ரூ.4 லட்சம் வழங்கப்பட்டது. அசோக்குமாரின் இறப்பால் குடும்பம் பாதிப்படைந்துள்ளதால் உரிய நிவாரணத் தொகை வழங்க வேண்டி அவரது மனைவி சரஸ்வதி சென்னை உயா் நீதிமன்றத்தில் வழக்கு தொடா்ந்தாா்.

இந்த வழக்கில் பல்லடம் நகராட்சி நிா்வாகம் சாா்பில் ரூ.27 லட்சம் நிவாரணத் தொகையை, 6 சதவீத வட்டியுடன் வழங்க வேண்டும் என்று சென்னை உயா் நீதிமன்றம் செவ்வாய்க்கிழமை உத்தரவிட்டது. இதைத் தொடா்ந்து, நீதிமன்றத்தில் வழக்கு தொடர தேவையான உதவிகளை செய்த மாணிக்காபுரம் ஊராட்சி முன்னாள் தலைவா் சாமிநாதனுக்கு மறைந்த அசோக்குமாரின் மனைவி சரஸ்வதி, மகள்கள் மகாலட்சுமி, ஸ்ரீமதி, மகன் மனோஜ்குமாா்(13) ஆகியோா் நன்றி தெரிவித்தனா்.